Հայաստանի Հանրապետության պետական սահմանը հատած ադրբեջանցի զինծառայողներին բռնելով՝ ՀՀ շարքային քաղաքացիները ոչ միայն իրավապահների, այլ նաև գաղտնի ծառայությունների ֆունկցիաներն են կատարում, որովհետև ՀՀ իրավապահ համակարգի գլխավոր նպատակն ընդդիմադիրների վրա գործեր կարելն է։ Azg.am-ի թղթակցի հետ զրույցում նման տեսակետ հայտնեց քաղաքագետ Գագիկ Համբարյանը՝ անդրադառնալով նախօրեին Սյունիքի մարզի Աշոտավան համայնքում գյուղացիների կողմից վնասազերծված առաջին և այսօր սյունեցի երեք երիտասարդների կողմից հայտնաբերված մյուս ադրբեջանցի զինծառայողների դեպքերին։
«Ենթադրաբար, ԱԱԾ-ի գլխավոր խնդիրը ոչ թե թուրք դիվերսանտներին բռնելն է, այլ ընդդիմադիրների հեռախոսները գաղտնալսելը, նրանց հետևելը։ Իրավապահ համակարգը զբաղված է Նիկոլի իշխանության պաշտպանությամբ։ Իրենց չի հատաքրքրում ո՛չ ՀՀ սահմանների, ո՛չ էլ ներքին անվտանգությունը։
Թուրքն անձամբ մտնում է Հայաստան, մի քանի օր ման գալիս, իսկ երկրի վարչապետը երեկ ԱԺ-ի ամբիոնից ենթադրություններ է անում և չի բացառում, որ նա արդեն հետ է գնացել։
Հիմա էլ լուրեր են տարածվում՝ կոնկրետ ԱԺ նախկին պատգամավոր Նաիրա Զոհրաբյանն է գրել, որ այդ նույն թուրք դիվերսանտի մոտից հայտնաբերվել է Զանգեզուրի պղնձամոլիբդենային կոմբինատի սպանված պահնորդ Հայրապետ Մելիքսեթյանի հեռախոսը։
Այսինքն՝ այդ մարդը մինչև վերջ իր դիվերսիոն գործողությունները կատարել է, Հայաստանի Հանրապետությունում մարդ է սպանել, իսկ մեր երկրի վարչապետը երեկ կրկին զբաղված էր հայկական բանակի վարկաբեկմամբ»,- ասաց Գագիկ Համբարյանը։
Քաղաքագետը շեշտեց՝ ինքը չի կարծում, որ ՀՀ իշխանությունները կարողանան Ադրբեջանին պարտադրել երկու դիվերսանտներին փոխանակել Բաքվում պահվող հայ ռազմագերիների հետ։
«Ես բացարձակ հույս չունեմ։ Ուրախ կլինեմ, որ ադրբեջանցի երկու դիվերսանտի դիմաց Փաշինյանը կարողանա գոնե մեկ հայ գերու հետ բերել»,- ամփոփեց Համբարյանը։
Հիշեցնենք, որ այսօր ՀՀ տարածքում հայտնաբերվել և ձերբակալվել է ադրբեջանցի երկրորդ զինծառայողը։ Ադրբեջանցի առաջին զինծառայողը հայտնաբերվել էր Սյունիքի մարզի Աշոտավան համայնքում։
