Ֆրանսիայի և Հայաստանի միջև հարաբերություններն արդեն մեծապես ռազմավարական են՝ հաշվի առնելով բոլոր այն համագործակցությունները, որոնց մասին քիչ առաջ հիշատակեցի՝ աջակցություն ենթակառուցվածքներին, ջրային ցանցին, շարժունակությանը, նորագույն տեխնոլոգիաներին։ Այսօր Երևանում հայ գործընկերոջ հետ համատեղ մամուլի ասուլիսի ժամանակ այս մասին ասաց Ֆրանսիայի արտաքին գործերի նախարար Ժան-Նոել Բարոն՝ պատասխանելով այն հարցին՝ արդյոք Հայաստանը և Ֆրանսիան պատրաստ են հարաբերությունները տեղափոխել ռազմավարական գործընկերության մակարդակ:
Եվրոպացի բարձրաստիճան պաշտոնյայի խոսքով՝ ինքն ու իր հայ գործընկերը մտադիր են բոլոր պայմանավորվածությունները հանձնել թղթին՝ նախապատրաստելով ռազմավարական գործընկերություն, որը ֆորմալ բնույթ կհաղորդի արդեն գոյություն ունեցող հարաբերություններին։
Ժան-Նոել Բարոն միաժամանակ հայտարարեց՝ Ֆրասիան Գորիսում հյուպատոսական գործակալություն կբացի։
Անդրադառնալով օրեր առաջ ՌԴ արտգործնախարար Սերգեյ Լավրովի՝ Երևանում Ֆրանսիայի հասցեին հնչեցրած քննադատություններին՝ Ժան-Նոել Բարոն նկատեց՝ վերջին օրերին ականատես են եղել ռուսական ագրեսիայից ի վեր՝ Ուկրաինայում ամենադաժան հարձակումներից մեկին։
«Մենք ունենք հստակ ուղերձ, մենք ցանկանում ենք խաղաղություն։ Բայց որպեսզի խաղաղություն լինի, նախ պետք է հրադադար լինի, որը հնարավորություն կտա պատշաճ բանակցություններ իրականացնել։ Ուկրաինան 3 ամիս է՝ համաձայնել է 30-օրյա հրադադարի։ Այժմ ՌԴ-ի հերթն է՝ ցույց տալու՝ արդյոք ցանկանում է շարունակել պատերազմը, թե պատրաստ է բանակցությունների»,- ասաց ֆրանսիացի նախարարը։
