Մարտի 30-ից ապրիլի 2-ը ԳԴՀ նախագահ Ֆրանկ Վալտեր Շթայնմայերը տիկնոջ՝ Էլքե Բյուդենբենդերի հետ կայցելի Հայաստան եւ Ադրբեջան, երեկ՝ մարտի 13-ին ծանուցեց ԳԴՀ նախագահի գրասենյակը: Շթայնմայերը Հայաստանում եղել է 2014-ին, երբ Գերմանիայի դաշնային հանրապետության արտգործնախարարն էր: Նա դաշնային առաջին նախագահն է, որ ժամանում է Հայաստան և Ադրբեջան։
Երկու երկրներում Շթայնմայերի հետ քննարկվող թեմաների առանցքում կլինեն տեղական տնտեսությանը, Գերմանիայի հետ հետազոտական համագործակցությանը, կրոնական ու մշակութային խնդիրներին վերաբերող հարցեր: Գերմանիայի նախագահը Հայաստանում հանդիպումներ կունենա իր պաշտոնակից Վահագն Խաչատուրյանի և վարչապետ Նիկոլ Փաշինյանի հետ։ Նախագահ Շթայնմայերը կայցելի Թումո ուսումնական կենտրոն, իսկ Հայաստանում գտնվելու երկրորդ օրը կմեկնի Դիլիջան, կհանդիպի հայ կին ձեռներեցների հետ, Սեւանի ափին կայցելի հայ առաքելական եկեղեցի, ապա՝ հիդրոօդերևութաբանական չափիչ կայան, որտեղ ներգրավված է գերմանական Հելմհոլց բնապահպանական հետազոտությունների կենտրոնը:
Ադրբեջանում Շթայնմայերը կհանդիպի նախագահ Իլհամ Ալիևի հետ։ ԳԴՀ նախագահը կլինի Բաքվի պատմական կենտրոնում, որ ՅՈՒՆԵՍԿՕ-ի համաշխարհային մշակութային ժառանգության մաս է համարվում: Գերմանիայի նախագահը մտադիր է քրիստոնյա, մահմեդական և հրեա հոգևորականների հետ քննարկել կրոնների միջև հանդուրժողականության հարցը, ինչպես նաեւ մասնակցել Ադրբեջանում կանանց խնդիրներին վերաբերող քննարկմանը:
Լուրը հաղորդած գերմանական ԶԼՄ-ները չեն մոռանում վերջին պարբերությամբ նշել՝ «Դաշնային նախագահի գրասենյակի հայտարարության մեջ չի նշվում՝ արդյոք քննարկվելո՞ւ է նաև Լեռնային Ղարաբաղի շուրջ երկու երկրների միջև ռազմական հակամարտության հարցը»։
ԱՆԱՀԻՏ ՀՈՎՍԵՓՅԱՆ, Գերմանիա
