Դավաճաններին «ահաբեկելու» և «խփելու» վերաբերյալ ֆեյսբուքյան գրառման համար Հայաստանում քրեական հետապնդման ենթարկվող կանադահայ Հրաչ Ջաբրայանը «Ապագե» հիմնադրամի գործադիր տնօրենն է, Շուշիի վերաբնակեցման ծրագրի հեղինակը։
NEWS.am–ի տեղեկություններով՝ Ջաբրայանը, նախքան իր գրառման առնչությամբ քրեական գործի հարուցումը, վերադարձել է Կանադա։ Իսկ մինչ այդ, Ջաբրայանն ակտիվորեն մասնակցում էր ՀՀ վարչապետ Նիկոլ Փաշինյանի դեմ իրականացվող բողոքի ցույցերին և անգամ իրավապահների կողմից բերման է ենթարկվել։ Նշենք, որ կանադահայ գործարարը վերջին տարիների ընթացքում խոշոր ներդրումներ է կատարել Արցախում, մասնավորապես Շուշիում, որը ներկայումս գտնվում է Ադրբեջանի վերահսկողության տակ։ Մասնավորապես Ջաբրայանը Շուշիում իրականացնում էր բնակարանաշինական մեծ ծրագիր, որով նախատեսվում էր առաջին հինգ տարում անվճար բնակարաններ հատկացնել Շուշի տեղափոխվող մեր հայրենակիցներին, այդպիսով նպատակ ունենալով առաջիկա տարիներին վերաբնակեցնել հայկական քաղաքը և բազմապատկել Շուշիի բնակչության թվաքանակը։ Բնակարանաշինական ծրագրի իրականացման շնորհիվ, նախքան պատերազմը, հարյուրավոր արցախցիներ ապահովվել էին աշխատատեղերով։ Սակայն պատերազմի հետևանքով Ջաբրայանը ոչ միայն կորցրել է իր ունեցվածքը, այլև զոհվել են իր ընկերներն ու ծրագրի աշխատակիցներից շատերը։
«Մենք հավատացել ենք, որ Արցախը կկարողանանք պահել, եթե այնտեղ ստեղծենք աշխատատեղեր, ինչը կնպաստի դեպի Արցախ ներգաղթին։ Ես չեմ ցավում իմ ունեցվածքի կորստի համար, ես ցավում եմ մեր հայրենիքի ու ժողովրդի կորստի համար»,–մեկ ամիս առաջ Հինգերորդ ալիքին տված հարցազրույցում հայտարարել էր Ջաբրայանը։
Վերջինս պատերազմի ընթացքում և դրանից հետո նյութական զգալի աջակցություն է ցուցաբերել զոհված և վիրավոր զինծառայողների ընտանիքներին, ինչպես նաև Արցախի տարբեր բնակավայրերի՝ այդ թվում Բերձորի Աղավնո գյուղի բնակիչներին։ Հավելենք, որ անկախությունից ի վեր Ջաբրայանը մեծածավալ ներդրումներ է իրականացրել նաև Հայաստանում՝ մասնավորապես Սյունիքում։ Ուշագրավ է, որ Ջաբրայանի գրառման հիմքով քրեական գործի հարուցումից հետո ֆեյսբքութում իշխանամերձ շրջանակներից կոորդինացվող օգտատերերը նրան ներկայացնում էին իբրև նախկին իշխանությունների սպասարկու, մինչդեռ փաստն այն է, որ Ջաբրայանի հարաբերությունները այնքան էլ հարթ չեն եղել նախկին իշխանությունների հետ։ Կանադահայ գործարարը, նախքան իշխանափոխությունը խնդիրներ է ունեցել նախկին վարչապետ Հովիկ Աբրահամյանի ու ՊԵԿ նախկին նախագահ Գագիկ Խաչատրյանի հետ և այդ մասին անգամ գրառումներ արել։ Ըստ Ջաբրայանի՝ հիշյալ անձանց ապօրինությունների արդյունքում կանադական ընկերությունը վաճառել էր Կապանի ոսկու հանքավայրը և հեռացել Հայաստանից։ Ավելին, Ջաբրայանը, որի գրառումը Քննչական կոմիտեն որակել է բռնություն գործադրելու կոչեր պարունակող հրապարակում, խոստովանում է, որ ժամանակին հույսեր է կապել թավշյա հեղափոխության և Նիկոլ Փաշինյանի հետ։
Հիշեցնենք, որ երեկ՝ փետրվարի 3–ին քննչական կոմիտեն հաղորդագրություն էր տարածել «Facebook.com» սոցիալական կայքում «Հրաչ Ջաբրայան» ֆեյսբուքյան օգտատիրոջ կողմից բռնություն գործադրելու կոչեր պարունակող ՝ «գրել եմ նոյեմբերի 10-ին… մնում եմ նույն կարծիքին… ահաբեկել դավաճաններին… Դաշնակցություն, արդեն շատ ուշացաք…խփեք դավաճանին» հրապարակում կատարելու դեպքի առթիվ՝ ՀՀ քրեական օրենսգրքի 226.2-րդ հոդվածի 1-ին մասով քրեական գործ հարուցելու մասին։
Արձագանքելով ՔԿ–ի հաղորդագրությանը, կանադահայ գործարարն իր ֆեյսբուքյան էջում գրել էր. «Ինչպես միշտ, ՀՀ Քննչական Կոմիտեն ստրուկն է դավաճան փաշաեւին… ահավոր վախցած եմ…»։ Ավելի ուշ Ջաբրայանը, դիմելով քննչական կոմիտեին, հիշեցրել էր, որ դեռևս 2020թ. նոյեմբերի 15–ին ֆեյսբուքյան օգտատարերից մեկը սպառնացել էր սպանել իրեն, սակայն իրավապահները դրան որևէ ընթացք չեն տվել։
«Քննչական կոմիտե, ասելու բան չունե՞ք, թե նորմալ է ձեր երկրում Նիկոլականը սպառնա ընդիմադիրի արյունը թափել…» տեղադրելով իր հասցեին բռնության սպառնալիք պարունակող մեկնաբանության սքրինշոթը, գրել էր բարերարը։
