Ալիևի կողմից եղել է փոխանակման ծրագրի առաջարկ։ Բանակցությունների արդյունքում ձևավորված առաջարկը Մինսկի խմբի համանախագահող երկրների կողմից դարձել է Քի-Վեսթի փաստաթուղթ, ըստ որի՝ Լեռնային Ղարաբաղը Լաչինով պետք է դառնար Հայաստանի մաս, իսկ Ադրբեջանը Նախիջևանի հետ կապ էր ստանում։ Փաստաթղթում որևէ տեղ Մեղրի անունը չկա։ Եկեք մեր ժողովրդին չմոլորեցնենք. ԱԺ ամբիոնից քպ-ականների դիմելով՝ ասաց «Հայաստան» խմբակցության պատգամավոր Աննա Գրիգորյանը։
«Հիմա Լեռնային Ղարաբաղը Լաչինի միջանցքով ամբողջությամբ օկուպացված է Ադրբեջանի կողմից, դուք նորից խոսում եք Նախիջևան-Ադրբեջան կապ տրամադրելու մասին, երեկ էլ խոսվեց, որ անխոչընդոտ, անկանգառ կապ եք պատրաստվում տալ։ Դուք հասկանո՞ւմ եք բանակցությունների էության տարբերությունը՝ որտե՞ղ ենք եղել և հիմա որտե՞ղ ենք հասել։ Դուք Մեղրիում եղել եք, չէ՞. Մեղրին իր տեղում է, չէ՞, չի կորել Մեղրին։ Եկեք ես ձեզ տանեմ Քոչարյանի «հանձնած» Մեղրի, դուք ինձ տարեք Լեռնային Ղարաբաղ»,- քպ-ականներին առաջարկեց Աննա Գրիգորյանը։
