Իջևանի ոստիկանները հարձակվել են գործադուլ հայտարարած հնդկաստանցի աշխատողների վրա

Իջևանի «Գրանդ տեքստիլ» կարի արտադրամասում աշխատող Հնդկաստանի քաղաքացիները նորից գործադուլ են անում։ Դեսպանատնից ուրբաթ օրը աշխատողներին համոզել են կասեցնել բողոքը՝ խոստանալով բանակցություններ սկսել երկուշաբթի, բայց ոչինչ չեն ձեռնարկել:

Այսօր դերձակները կրկին դուրս են եկել փողոց։ Ֆաբրիկայի տնօրենը, որը 3 օր անտեսում էր աշխատողներին և նույնիսկ զանգերին չէր պատասխանում, երկուշաբթի եկել է գործադուլավորների մոտ, հայհոյել և սպառնացել նրանց, ինչպես սովորաբար անում է աշխատանքի ընթացքում՝ Epress.am-ին պատմել են դերձակները։

Մայիսի 8-ին մի քանի տասնյակ միգրանտ աշխատողներ գնացել են Իջևանի ոստիկանության բաժանմունք՝ տնօրինության դեմ հաղորդում ներկայացնելու։

Ոստիկանները չեն ընդունել նրանց դիմումը և խնդրել են վերադառնալ արտադրամաս։ Միգրանտ աշխատողներին անտեսել է նաև Հնդկաստանի դեսպանատունը՝ հորդորելով ինքնուրույն լուծել գործատուի հետ խնդիրները։

Տնօրինության ճնշումների և ապրելու անտանելի պայմանների դեմ բողոքող Հնդկաստանի քաղաքացիները մայիսի 13-ին ենթարկվել են ոստիկանության հարձակման։

Աշխատավորները տեսանյութեր են ուղարկել Epress.am-ին և տեղեկացրել, որ ոստիկանները չեն բացատրել, թե ինչի են եկել և ինչ են պահանջում, բռնի ուժով բերման են ենթարկել առնվազն 9 հոգու։ Ֆաբրիկայի աշխատողները ենթադրում են, որ ոստիկանները սպասարկում են տնօրինության շահերը։

Epress.am-ին ՆԳՆ-ից հայտնել են, որ ոստիկանները արտադրամասի տարածք են մտել «հանրային կարգի խախտման ահազանգից հետո և բերման են ենթարկել մեկ հոգու, որը հրաժարվել է ենթարկվել պահանջներին»։ Այլ մանրամասներ ուժայինները չեն հայտնել։

18-19 դերձակներից բաղկացած խմբերին ստիպում են աշխատել օրական 11 ժամ, մեկ հերթափոխի ընթացքում նրանք պիտի մոտ 120 կոմպլեկտ համազգեստ կարեն։ Նոր շոֆը հիմա 200 կոմպլեկտ է պահանջում։ Աշխատողները պնդում են, որ դա անհնարին է․ «Մարդ ենք, ռոբոտ չենք»։

Ռուս տնօրենը Epress.am-ի հետ զրույցում փորձել է հերքել՝ ոչ մեկ ոչ մի անհնարին բան իրենցից չի պահանջում, ոչինչ չի ստիպում և այլն։ Աշխատանքային վեճը, ըստ նրա, ծագել է ոչ թե գերշահագործման, այլ աշխատողների խուլիգանության պատճառով։ Նրանք իբրև թե խախտում են պայմանագրային դրույթները՝ հաճախակի զուգարան գնալով և բլյութուզով երաժշտություն լսելով։

Կարի ֆաբրիկայի պատերին եռալեզու հուշաթերթիկներ են կպցրած։ Դրանցից մեկում նշված է, որ աշխատանքային օրը սկսվում է առավոտյան 8։00-ին և ավարտվում 19։00-ին։ 11 ժամից՝ 39 600 վայրկյանից, 3 600 վայրկյանը կարելի է ծախսել ճաշի ընդմիջման վրա, «խմելու/քաքելու/թելերի» համար հատկացված է առավելագույնը 1 800 վայրկյան։ Մնացած 34 200 վայրկյանի ընթացքում դերձակները պիտի անընդմեջ կարեն։

epress.am – Անկախ լրագրողների ցանց