(ճանաչված բարերար և հասարակական գործիչ Հրաչյա Պողոսյանի ծննդյան
54-րդ տարեդարձի առթիվ)
Օգոստոսի 11-ին լրանում է պետերբուրգաբնակ մեր նշանավոր հայրենակից, ճանաչված բարերար և հասարակական գործիչ, մեր թերթի լավ բարեկամ ՀՐԱՉՅԱ ՄԻՍԱԿԻ ՊՈՂՈՍՅԱՆԻ ծննդյան 54-րդ ամյակը:
Հրաչյա Պողոսյանը հարգանքի և մեծագույն գնահատանքի արժանի սիրելի անձնավորություն է հազարավոր մարդկանց համար, նա այսօր հայտնի է Հայաստանում, Ռուսաստանում և աշխարհի բազմաթիվ անկյուններում: Մարդ, ում անունն առաջին հերթին առնչվում է չափազանց Աստվածահաճո և դրվատելի մի առաքելության՝ բարեգործության հետ:
Այս տարվա ապրիլի 9-ին Սանկտ Պետերբուրգում տեղի է ունեցել Հրաչյա Պողոսյանի կյանքի եւ գործունեության մասին պատմող «Մեր հիշողության հովանավորը» գրքի շնորհանդեսը: Գիրքը լույս է ընծայվել «Կոմսոմոլսկայա պրավդա» հրատարակչության կողմից և պատմում է Հայաստանի Ագարակ փոքրիկ գյուղում մեծացած հայ տղայի՝ տարիներ անց արդեն Սանկտ Պետերբուրգի պատվավոր հովանավոր Հրաչյա Պողոսյանի կյանքի ուղու մասին՝ մանկություն, ուսում, ընտանիք, հասարակական գործունեություն, բարեգործություն, ճանաչում…
Վերաձևակերպելով գրքի վերնագիրը, շատ եմ ցանկանում՝ այսօր, այս առիթով «Մեր հիշողության հովանավորը» վերնագիրը դարձնել «Սերունդների հիշողության հովանավորը», քանզի Հրաչյա Պողոսյանն իր բարեգործություններով փորձում է կապ ստեղծել անցյալի, ներկայի և ապագայի միջև, վեր հանել անարդարացիորեն մոռացված իրողությունները և այդ ամենը հանձնել սերունդներին, որպեսզի եկողները տեսնեն և գնահատեն կատարված գործերը և էստաֆետը փոխանցեն հաջորդ սերունդներին։
Ասվածի վկայությունները կյանքի կոչված հարյուրավոր ինքնատիպ գործերն են:
Հրաչյա Պողոսյանը 25 տարվա բարեգործական գործունեության ընթացքում աշխարհի 14 երկրներում իրականացրել է ավելի քան 400 ծրագիր, որոնցից 200-ը նվիրված են Հայրենական մեծ պատերազմի հերոսներին եւ իրադարձություններին:
Աշխարհի որ անկյունում էլ իրականացրել է իր հերթական մտահղացումը՝ արել է սիրով ու նվիրումով և հայ ժողովրդի արժանի զավակի բոլոր ձեռնարկումները արդյունք են տարիների նրա տքնաջան աշխատանքի։
Բարեգործությունը Հրաչյա Պողոսյանի համար ոչ թե ցուցամոլություն է, այլ՝ հավատամք, քրիստոնեական կենցաղավարության ու բարեպաշտության դրսևորում, և այս առաքինի ու պատվախնդիր հայը Աստծո պարգևած յուրաքանչյուր օրն ապրում է առաջ նայելով, մարդկանց օգտակար լինելու մեծ ցանկությամբ, քանզի գիտակցում է՝ երջանկությունը հարուստ լինելու և շատ ունենալու մեջ չէ, այլ` աշխարհին, քո շրջապատի մարդկանց և պատմությանը շատ տալու:
Հանրության ջերմ սերն ու հարգանքը վայելող բարերարի և իր անունը կրող բարեգործական հիմնադրամի կողմից երկար տարիների ընթացքում իրականություն դարձած գործերը վերաբերվում են մեր կյանքի բոլոր ոլորտներին: Պողոսյանի սրաթռիչ մտքի արգասիք, զարմանք հարուցող ու երբեմն անհավատալի և հիացմունքի արժանի գործունեությունը բարձր գնահատականների է արժանացել իշխանության բարձր օղակներում ինչպես Ռուսաստանում և Հայաստանում, այնպես էլ աշխարհի տարբեր երկրներում, որտեղ իրականացվել են նրա նախաձեռնությունները:
«Իմ ամեն մի մտահղացման, յուրաքանչյուր նախագծի մեջ կարևորագույն գործոնը հաջողության հանդեպ հավատն է: Առանց հավատի հաջողությունն անհնարին է». ահա սա է ճանաչված բարերարի հաջողության գաղտնիքն ու հավատամքը, որին հավատարիմ՝ նա երկար տարիներ ուրախության պահեր է պարգևել հազարավոր մարդկանց և կենդանացրել բազմաթիվ աներևակայելի, մեկը մյուսից գունեղ երազանքներ:
Հրաչյա Պողոսյանի անցած ուղին հայրենասիրության, աշխատասիրության և պարտաճանաչության փայլուն օրինակ կարող է ծառայել երիտասարդ սերնդին, նա ամենուր իրեն դրսևորում է որպես բանիմաց և պատասխանատու մարդ, նրա բոլոր ձեռնարկումները ուղղված են մեկ նպատակի՝ հանուն մարդու և մարդկության: Որպեսզի աշխարհում գիրիշխի սերը, բարությունը և միշտ հիշվեն լավ մարդկանց լավ գործերը:
Կրկին շնորհավորում ենք մեր պատվարժան հայրենակցին՝ ծննդյան 54-րդ ամյակի կապակցությամբ: Քանի որ Դուք հիանալի ամուսին եք և նույնքան հիանալի հայր, ապա ցանկանում ենք, որ անչափ հայեցի Ձեր ընտանիքը՝ տիկին Նազիկը և Ձեր 4 երեխաները մշտապես հիանան Ձեզնով և այսուհետ ևս իրենց ներկայությամբ թևութիկունք լինեն Ձեզ: Թող մշտապես անամպ լինի Ձեր երկինքը և Ձեր մշտական ուղեկիցները լինեն Բարությունն ու Հաջողությունը:
Թող Ձեր բարի ժպիտն ու ներկայությունը չպակասի աշխարհից…
ԳՈՀԱՐ ԲՈՏՈՅԱՆ
ՌԴ-ում «Ազգ»-ի հատուկ թղթակից
