ԵՊՀ ռազմավարական հետազոտությունների կենտրոնի ղեկավար Ալվինա Աղաբաբյանը գրել է.
Ադրբեջանական լրատվամիջոցները տարածում են այս լուսանկարը՝ ներկայացնելով այն որպես մայիսի 28-ին մեր զինծառայողի խոցման վայր։
Լուսանկարում երևացող վրանը, ենթադրաբար, մեր զինծառայողների կացարանն է։ Որպես տեղանք՝ նշվում է Սյունիքի Ներքին Հանդ գյուղը, այն նույն Ներքին Հանդը, որի հատվածում ս.թ. մարտի սկզբին ադրբեջանցիք առաջ էին եկել 500-800 մետր։
Պատերազմից անցել է մոտ 19 ամիս, որը լիովին բավարար էր մեր նոր շփման գծի գոնե առավել կարևոր և վտանգավոր հատվածներում ամրաշինական աշխատանքներ կատարելու և դրանք կահավորելու համար, հատկապես երբ արդեն մեկ տարի է՝ թշնամին շարունակում է իր ներխուժումը ՀՀ և ռազմակալում է նորանոր տարածքներ։
1.
▪︎Ինչու՞ այդ աշխատանքները չեն կատարվել,
▪︎ինչու՞ առ այսօր ամրացված չէ թշնամու հետ մեր շփման գիծը,
▪︎ ինչու՞ մեր զինծառայողներն ապահովված չեն պատշաճ կացարաններով և շարունակում են ծառայություն իրականացնել վրանների տակ,
հատկապես երբ պետությունն ունի դրա համար անհրաժեշտ ֆինանսական միջոցները, փաստ՝ ոստիկանությանը միայն վերջին օրերին բաժանված մոտ 3 100 000 000 ( 3.1 միլիարդ) գումարը։
2. Ինչու՞ են մեր զինծառայողների վրանները տեղադրված պարզ դիտարկվող վայրում՝ անմիջապես թշնամու ուղիղ խոցման կրակի տակ։
3. Արդյո՞ք պետության փաստացի սահմանի և զինծառայողի հանդեպ նման վերաբերմունքը կանաչ ազդանշան չէ Ադրբեջանին՝ շարունակելու զավթել ՀՀ ինքնիշխան տարածքը և սպանելու մեր զինծառայողներին…
Մեր զինվորների վրան-կացարանները թշնամու կողմից տեսանելի վայրում տեղադրելու վերաբերյալ «Պատիվ ունեմ» խմբակցության պատգամավոր Տիգրան Աբրահամյանը գրել է.
Երբ մեր զինծառայողի զոհվելու օրն ինձ ասեցին, որ խոցման պահին զինծառայողը գտնվել է վրանում, առհասարակ զորքերի պահպանության այդ հատվածում զինծառայողները վրանում են ծառայություն անցկացնում, հիշեցի այս իշխանությունների հավաստիացումները, որ առաջնագիծն ապահովված է համապատասխան կացարաններով։
Եթե նույնիսկ վրան տեղադրվել է, ապա ի՞նչ որոշումների հիման վրա է այն տեղադրվել խոցելի, տեսանելի, թշնամու կրակի համար հասանելի հատվածում։
