ՀԷՑ-ի այսօրվա կառավարիչներն ասում են, թե իբր մեր ժամանակ տենդերներին 2-3 մասնակից էր լինում, հիմա 14–15 մասնակից է լինում, իբրև թե մենք մասնակիցներին թույլ չէինք տալիս, չէինք ներգրավում. կոչ եմ անում հրապարակել այդ բոլոր մասնակիցների անունները, գործունեության ոլորտը մինչև այս տենդերներին մասնակցելը և ֆինանսական բարձիկի չափը, այսօր հայտարարեց ՀԷՑ–ի նախկին տնօրեն Դավիթ Ղազինյանը։
«Որովհետև դրանք մեծ տենդերներ են. չի կարելի նոր բացված ինչ-որ կազմակերպության վստահել այդպիսի տենդերներ: Եթե չհրապարակեցին ամբողջությամբ, ուրեմն սա հերթական սուտն է, իսկ ես համոզված եմ, որ սա հերթական սուտն է»,- նշեց նա։
Դավիթ Ղազինյանն անդրադարձավ նաև այն խնդրին, որ նոր միացումների, նոր բաժանորդների համար ներդրումային ծրագրի մեջ դրվել է ընդամենը 77 միլիոն դոլար, սակայն փաստացի կատարվել է 254 միլիոն դոլարի ներդրում։
«Այսինքն՝ մենք մի հոդվածից վերցրել, դրել ենք նոր միացման հոդվածի վրա, վերցրել ենք շահագործումից, որը ենթադրում է նոր մալուխներ, նոր հենասյուներ։ Եթե հանձնաժողովի ստիպելով մենք չշեղվեինք մեր ներդրումային ծրագրից, սակագնի թանկացման հարց էր լինելու։ Մենք բազմաթիվ անգամ ասել ենք՝ ազատականացրեք շուկան այս մասով։
Պատկերացրեք, բազմաբնակարան շենքի կառուցապատողը, սեփականատերը գալիս վճարում է գումար, որի ընդամենը 20%-ն է անում ամբողջ այդ կատարվող աշխատանքի, իսկ 80%-ը դրվել է ՀԷՑ-ի կողմից և դրվել է այն հոդվածից, րը պետք է ծառայեր ցանցի կատարելագործմանը, նորացմանը»,-նշեց Ղազինյանը։
Բանախոսն անդրադարձավ նաև իշխանությունների այն հայտարարությունը, թե ՀԷՑ-ի ներսում քրեական սխեմաներ են գործել։
«Լավ, ու՞ր է այդ ամեն ինչը։ Վարույթը պետք է տևեր երեք գումարած մեկ ամիս։ Իմիջիայլոց, ձեզ ասեմ՝ այդ պլյուս մեկ ամիսը դա բացառիկ դեպքերում է արվում, ինչ-որ ֆորս մաժորային ինչ-որ խնդիրների դեպքում։ Հիմա ձեզ մոտ հարց չի՞ առաջանում, թե ինչի երկարացվեց ևս մեկ ամիս, ինչի՞ երեք ամսում չավարտեցին այդ վարույթը։ Ես դրա պատասխանն ունեմ՝ որովհետև ոչ մի բան չեն գտել։ Կարող է՝ գտել են ինչ-որ բաներ, որոնք տուգանքի ենթարկելու, տույժի նկատողության հարց կարող է առաջացնել, բայց լիցենզիայից զրկելու հիմք չեն գտել։
Ես ձեզ ամենայն պատասխանատվությամբ հայտարարում եմ, որ ստիպված որոշում են կայացրել իրենց իմիջի հաշվին ևս մեկ ամիս երկարացնել, որպեսզի փորձեն այս մեկ ամսվա ընթացքում էլ ինչ-որ մեկին բռնեն։
Այս ամբողջի մեջ առաջին գործը, եթե չեմ սխալվում, երկու ամիս առաջ են ուղարկել դատախազություն։ Լավ ի՞նչ եղավ։ Մենք տեսնում ենք, որ տարբեր քաղաքական գործերով 1-2 օրում, 1-2 ժամում ինչպես են մարդկանց տանում արագ և այլն, բա ո՞ւր են։ Այսինքն՝ ակնհայտ է որ դա ընդամենը արվում է, քանի որ նախընտրական քարոզարշավ են սկսել Սամվել Կարապետյան հաշվին։ Ուղղակի մի բան չեն հաշվում, որ չի հաջողվելու»,– ընդգծեց նա։
