ԱԱԾ նախկին տնօրեն Միքայել Համբարձումյանը հայտարարել է, որ չի մասնակցելու ընտրական գործընթացներին։ «Ես չեմ զբաղվում քաղաքականությամբ եւ չեմ պատրաստվում մասնակցել արտահերթ խորհրդարանական ընտրություններին»,- «Փաստինֆո»-ի հետ զրույցում ասել է Միքայել Համբարձումյանը՝ նշելով, որ ընտրություններին մասնակցելու է բացառապես որպես ընտրող։
Մ. Համբարձումյանն ու ԱԱԾ պաշտոնաթող այլ բարձրաստիճան սպաներ օրերս հայտարարել էին նոր նախաձեռնության՝ «Ազգային անվտանգության ծառայության պահեստազորի սպաների միություն» հասարակական կազմակերպության ձեւավորման մասին։ Ըստ նախաձեռնողների՝ այն զբաղվելու է հասարակական գործունեությամբ՝ կոչված պահպանելու պահեստազորում գտնվող սպաների բարձր հեղինակությունը։ Այսօր տեղի է ունեցել կազմակերպության անդրանիկ նիստը, որին մասնակցել են նաեւ ԱԱԾ նախկին տնօրեն Արթուր Վանեցյանը, ՀՀ ԱԱԾ-ի առաջին նախկին տեղակալ Հրանտ Եպիսկոպոսյանը եւ այլք, որի ժամանակ քննարկվել են կառույցի ծրագրային խնդիրներն ու առաջիկա անելիքները։
Նշենք, որ կառույցն իր գործունեությունը ծավալելու է նաեւ Արցախում, որտեղ աշխատանքները համակարգելու է ԱՀ ԱԱԾ նախկին տնօրեն Արշավիր Ղարամյանը։ Վերջինս նաեւ Խորհրդի անդամ է։
