Ալեն Սիմոնյանը, բազմոցին նստած, չի կարող հասկանալ, թե ինչէ կատարվել Արցախում, ինչպես է ամեն ինչ եղել, և ինչու է արցախցին թողել-դուրս եկել իր ծննդավայրից։ Համենայնդեպս, վախից դուրս չի եկել, այլ իր պատիվը պահելու, պայքարը շարունակելու համար, Azg.am-ի թղթակցի հետ զրույցում ասաց Azg.am-ի թղթակցի հետ զրույցում այս մասին ասաց Արցախի «Մայրություն» ՀԿ-ի նախագահ Հասմիկ Միքայելյանը՝ անդրադառնալով ԱԺ նախագահ Ալեն Սիմոնյանի՝ արցախցի լրագրողին ուղղված այն խոսքերին, թե «կարելի էր մնալ ու պայքարել մինչև վերջ, բայց դուք դուրս եկաք»։
Ըստ մեր զրուցակցի՝ Ալեն Սիմոնյանը ոչ մի բարոյական իրավունք չունի այս հարցին անդրադառնալու, որովհետև նա այն մարդը չէ, որ իր աթոռին նստած՝ արցախցու՝ Արցախից դուրս գալու մասին դատողություններ անի, արցախցիների փոխարեն մտքեր հայտնի։
«Իսկ թե ինչու է նա Արցախին Ղարաբաղ ասում, նրանից է, որ վախկոտները Ղարաբաղն են ծախել, իսկ մենք Արցախում էինք ապրում։
Ալեն Սիմոնյանը ոչ մի կերպ իրավունք չունի խառնվի այս հարցերին։ Մենք իրենից ոչինչ չենք սպասում, ոչ մի լավ բան չենք սպասում և հարցեր չենք տալիս։ Լրագրողն Ալեն Սիմոնյանին հարցնում է՝ արցախցիների՝ Արցախ վերադառնալու հետ կապված ի՞նչ պլաններ ունեք, ինքն ասում է՝ արցախցիները դուրս են եկել, թող մնային, պայքարեին։
Մենք պայքարել ենք 38 տարի, 4 պատերազմը մենք ենք տեսել։ Վերջին երկու պատերազմի ժամանակ մեզ ծախել են, դրա համար էլ մենք դուրս ենք եկել։ Մենք չենք ուզել, որ մեզ մորթեն, մենք չենք ուզել, որ մեզ բռնաբարեն, մենք չենք ուզել, որ մեզ ոտքի տակ տան։ Իսկ Սիմոնյանը Փաշինյանի հետ միասին դրան են բերել»,- ամփոփեց Հասմիկ Միքայելյանը։
Հիշեցնենք, որ արցախցի լրագրողն այսօր ԱԺ նախագահ Ալեն Սիմոնյանին հարց էր ուղղել՝ ե՞րբ է ինքը վերադառնալու իր հայրենիք՝ Արցախ։
«Երբ որ անվտանգ կլինի»,- արձագանքել էր Սիմոնյանը։
Լրագրողը նաև հետաքրքրվել էր՝ ինչո՞ւ է Ալեն Սիմոնյանը Արցախին «Ղարաբաղ» ասում։
«Իսկ դուք Ղարաբաղ չե՞ք ասում, չե՞ք ասում, որ «մենք ղարաբաղցիներ ենք, ղարաբաղահայ ենք»։ Ես քաղաքական գործիչ եմ ու դեմ եմ, որ ինչ-որ այլ երկրի քաղաքացի իմ քաղաքներից մեկն անվանի թուրքական կամ ադրբեջանական անուններով, ես քաղաքական գործչի էթիկան պետք է պահպանեմ»,- պատասխանել էր Սիմոնյանը։
Երբ լրագրողները նրան հիշեցրել էին, որ ժամանակին ասում էր Արցախ՝ Ալեն Սիմոնյանն նկատել էր, որ սխալ էր անում։
ԱԺ նախագահը նաև մեղադրել էր արցախցիներին, որ չեն մնացել իրենց հայրենիքում և չեն պայքարել։
«Երբ դուք այդտեղից դուրս եկաք, անվտանգ չէր, չնայած՝ կարելի էր մնալ ու պայքարել մինչև վերջ, բայց դուք դուրս եկաք»,- հայտարարել էր Ալեն Սիմոնյանը՝ պարբերաբար կրկնելով՝ «պետք էր կռվել»։
