Օրեր առաջ Նիկոլը փողոցում, կրկեսի մոտ, QR կոդով տոմս առավ, նստեց ավտոբուս, գնաց 1-1.5 կմ, իջավ կառավարության ամառանոցի մոտ։ Արդյունքը՝ հանրությանը ներկայացրեց 22 վայրկյանանոց ռիլ։ Տրանսպորտի թանկացման ֆոնին անձնական օրինակով, իրեն հույժ բնորոշ PR ակցիա։ Սա այն, ինչ տեսել եք, ՀՀ սիրելի քաղաքացիներ։
Հիմա՝ այս 22 վայրկյանից դուրս մնացածը։
Ամերիկա գնալուց առաջ Նիկոլը հանձնարարում է կազմակերպել ավտոբուսային ճամփորդությունը ու մեկնում։ Համակարգը սկսում է աշխատել։ Ճշտվում է օրվա ժամը, ավտոբուսային երթուղին, ստուգվում են վարորդները, ովքեր պիտի լինեն ավտոբուսում, Նիկոլին որտեղից պիտի բերեն կանգառ։ Ներգրավվում են իր պահպանության երեւացող ու չերեւացող բաժինները՝ 30-35 հոգի, հստակեցնում են ԱԱԾ-ի եւ ոստիկանության աշխատակիցների անելիքները, ներգրավվում են տասնյակ մեքենաներ, օպերատիվ համարներով, քաղաքացիական հագուստով տասնյակ ծառայողներ։ Ընդհանուր թիվը՝ հարյուրից ոչ պակաս։
Մեկ շաբաթ մշակում են օպերացիան։
Նիկոլը վերադառնում է Ամերիկայից։ Նրան ամենայն մանրամասնությամբ ներկայացվում է ծրագիրը, իր գերանվտանգության իմաստով շտկումներ է անում։ Շաբաթ օրը մեկնարկը տրվում է։ Տանում են կանգառ, ուշադիր աջ ու ձախ, վերեւ ներքեւ են նայում, նստեցնում ավտոբուս, ուղեկցում մինչեւ Պրոշյան փողոց։ Օպերացիան ավարտված է, նկարահանող խումբը գործն արել է։ Քաղաքացիներին խաբող 22 վայրկյան ռիլը պատրաստ է։
Հիմա մի այլ պատմություն, սիրելի քաղաքացիներ, որ դուք իմանաք` ով է մեր ու ձեր երկիրը ղեկավարում։ Այս մասին ասել եմ 2020-ի դեկտեմբերի 1-ին։
2019-ի ամռան այն օրը, երբ Ռոբերտ Քոչարյանին դատարանն ազատ արձակեց, Նիկոլը վախից կուչ է եկել ամառանոցի սենյակներից մեկում ու դողդողացել։ Արդյո՞ք նրան մեծ դժվարությամբ են դուրս բերել ընկճախտից։ Արդյո՞ք նա այդպես դողդողացել է նաեւ տարիներ առաջ «Կոշի» կալանավայրում՝ կին փաստաբան Զարուհի Փոստանջյանի ձեռքը բռնած։
Արդյո՞ք այդ նույն օրերին, երբ ամառանոցի դիմացի լանջի խոտերը հրդեհվել են, Նիկոլը հիստերիայի մեջ աղաղակել է՝ գալիս է, գալիս է, սա Քոչարյանն է ազդանշան ուղարկում։ Արդյո՞ք մինչեւ Ֆելիքս Ցոլակյանը չի զանգել, չի ասել, թե մենք ենք խոտերը վառել, կանխարգելիչ հրդեհ է, ամեն ինչ վերահսկողության տակ է, Նիկոլը նոր չի հանգստացել։
Նիկոլը մի անգամ ասել է՝ մեր ժողովրդին ես բոլորից լավ եմ ճանաչում։ Եւ ճիշտ է, եւ սուտ։ Նիկոլը լավ է ճանաչում մեր ժողովրդի առավելագույնը 5-7 տոկոս հատվածին, որի մարմնավորումն ինքն է. մարդատյաց, անսուրբ, խոստումնազանց, սուտասան, դեմագոգ, սարսափելի վախկոտ ու սարսափելի փողասեր։ Այս տեսակը դեռ իշխանության է Հայաստանում։
Աղվան Վարդանյան, ԱԺ «Հայստան խմբակցության պատգամավոր, 11.02.2025 թ.
