Արդյոք իշխանությունը կգնա խախտումների. այո՛, մեծ ռիսկեր կան, որ կգնա մեծագույն խախտումների, որովհետև այս իշխանության գլխավոր խնդիրը սխալները կոծկելն է, այսօր հրավիրված մամուլի ասուլիսի ժամանակ հայտարարեց «Միասնության թևեր» քաղաքական նախաձեռնության ղեկավար Արման Թաթոյանը։
Նրա խոսքով՝ իշխանության օրակարգերը կապ չունեն Հայաստանմի զարգացման հետ, դրա համար էլ իրենք պետք է ապավինեն հայ ժողովրդին։
«Միայն մեր ժողովրդի աջակցությամբ, որն ամենազորեղը, ամենամաքուրն է և ամենաառաքինին է, այս խնդիրները կկանխարգելվեն, և երկիրը բոլորով միասին դուրս կբերենք այս վիճակից»,- ասաց Թաթոյանը։
Ըստ նրա՝ իշխանությունը պատրանքներ է տարածում, որ դրսից ամեն ինչ որոշված է։
«Ո՛չ, մենք կարող ենք համախմբվելով առաջ տանել մեր երկիրը, զարգացնել այն»,- շեշտեց Թաթոյանը։
Անդրադառնալով հարցին, թե ով է բերել կամ ում պրոյեկտն է «Միասնության թևեր» քաղաքական նախաձեռնությունը, ինչպես նաև ինչ աղբյուրներից է ֆինանսավորվում, նա պատասխանեց՝ ինքն ու իր թիմակիցներն անում են այն, ինչ պետք է Հայաստանին ստեղծված իրավիճակից հանելու համար։
«Միևնույն է, շարունակելու են ասել՝ սրա պրոյեկտն է, նրա պրոյեկտն է. դա իշխանության օրակարգն է։ Դա Հայաստանը հիասթափության և լճացման մեջ պահելու օրակարգ է։ Այս շարժումը հենց նրա համար ենք նախաձեռնել, որ այլևս երկրի զարգացումը չարգելակեն։
Իմ գործունեությունը միշտ ֆինանսավորվել է մեր հայրենակիցների ներդրումներով։ Այդտեղ ոչ մի գաղտնի բան չկա․ նրանք պարզապես մարդիկ են, ում չեմ ճանաչում, իմ ընկներերից են։ Չկա որևէ մի մեծահարուստ մարդ, որ մեզ ամբողջապես ֆինանսավորում է, մի հատ էլ թելադրելու է, թե ինչ անենք։ Ես բոլոր որոշումները կայացնում եմ ինքնուրույն՝ խորհրդակցելով մեր թիմի հետ։ Ամեն ինչ բաց-թափանցիկ է»,- հավաստիացրեց Արման Թաթոյանը։
