Քիչ առաջ «Միասնության թևեր» կուսակցության նախագահ Արմեն Գալստյանը, նույն կուսակցության պատգամավորության թեկանածուներ Լիպարիտ Դրմեյանը և Նարեկ Բալաբեկյանն իրենց 80 հոգանոց ընտրական ցուցակը ներկայացրեցին ԿԸՀ։
Լրագրողներն Արմեն Գալստյանը հետաքրքրվեցին՝ ինչու «Միասնության թևեր»-ը հայտարարեց «Հայաքվե»-ի հետ համագործակցության մասին, իսկ ավելի ուշ անսպասելի կերպով տեղեկացրեց համագործակցության դադարեցման մասին։ Ի պատասխան՝ կուսակցության նախագահը նկատեց.
«Փորձեցիքն մեր ծրագրային դրույթները համաձայնեցնել, բայց ժամկետը բավական սուղ էր, և կային անհամապատասխանություններ մեր մոտեցումների միջև, և մենք փոխադարձաբար որոշում կայացրեցինք, որ այս փուլում համագործակցությունը պետք է դադարեցնել։ Հետագայում գուցե նույնպես հնարավոր լինի կամ չլինի համագործակցությունը։
Ամեն մեկս մեր մոտեցումներն ունենք տարբեր հարցերի վերաբերյալ, և այդ հարցերի շուրջ մեր բանակցությունները երկարում էին։ Շատ բարիդրացիական, ջերմ փոխհարաբերույթունները հիմա էլ շարունակվում են «Հայաքվե»-ի հետ, պարզապես այս փուլում ընտրական գործընթացներին միասին մասնակցությունը որոշեցինք դադարեցնել»,- ասաց «Միասնության թևեր» կուսակցության նախագահը՝ հիշեցնելով, որ ընտրություններին մասնակցում են ինքնուրույն ցուցակով՝ դրանում ներառած լինելով «Շանթ» դաշինքի անդամներին և անկուսակցական անձանց։
Արմեն Գալստյանը հավաստիացրեց, որ իրենց ցուցակը կազմված է պրոֆեսիոնալներից։ Նա միաժամանակ չմանրամասնեց այն հիմնական տարաձայնությունների մասին, որոնց պատճառով «Հայաքվե»-ի հետ համագործակցությունը դադարեցվեց՝ միայն հավաստիացնելով, որ խնդիրը ընտրացուցակում տեղերի տեղաբաշխումը չի եղել. տարաձայնություններից մեկը վերաբերել է արցախցիների՝ Արցախ վերադարձի իրավունքին։
«Մեծ ոգևորությամբ այսօր մեր ցուցակը ներկայացրել ենք և շատ դրական ենք գնահատում։ Մեր աշխատանքներից են կախված հետագա արդյունքները»,- ասաց նա։
Հարցին՝ ինչպե՞ս են կարողացել հոգալ գովազդի հետ կապված մեծ ծախսերը, և արդյոք ճիշտ են տեղեկությունները, որ «Միասնության թևեր»-ը ֆինանսավորվում է ՀՀ երրորդ նախագահ Սերժ Սարգսյանի կողմից, կուսակցության նախագահը պատասխանեց՝ իրենց Սերժ Սարգսյանը չի ֆինանսավորում. ֆինանսավորում են տարբեր մարդիկ, ընկերենր, ներդրված են սեփական միջոցներ։
«Դրանք տարբեր աղբյուներից միջոցներ են, հետագայում հրապարակվեն ֆինանսական հաշվետվություններ, Սերժ Սարգսյանը չի ֆինանսավորում մեր գործունեությունը»,- ասաց Գալստյանը։
