Ադրբեջանական զինված ծառայողները հայտնվել են Սյունիքի մարզի համայնքներն իրար կապող ճանապարհներին։ Զինված մարդիկ են՝ ադրբեջանցիներ, որոնք մի քանի ամիս առաջ խոշտանգում և ծեծի էին ենթարկում մեր հայրենակիցներին։ Այս մասին հրավիրված մամուլի ասուլիսին ասել է ՀՀ ՄԻՊ Արման Թաթոյանը՝ ընդգծելով, որ մարդու իրավունքների տեսանկյունից այս օրերին ակնհայտ խնդրահարույց են այն սադրանքները, որոնք նպատակ ունեն խիստ անհանգստություն պատճառել Հայաստանի, հատկապես՝ Սյունիքի մարզի խաղաղ բնակիչներին, առաջին հերթին՝ երեխաներին։
«Ինձ երբեմն պատճառաբանություններ են բերվում, ասում են՝ գիտեք ինչ կա, նրանք սահմանապահ զորքերի ծառայողներ են, իսկ նրանք մի փոքր ուրիշ են, այլ նպատակներ ունեն։ Լավ, ես հասկանում եմ, նրանք սահմանային վերահսկողություն են իրականացնում և նրանց գործառույթներն այլ են, բայց պետք է նայել համատեքստում։ Ադրբեջանի կողմից վարվող խորքային էթնիկ ատելությամբ քաղաքականության մեջ և խոսքը վերաբերում է զենքով, զինվորական համազգեստով ադրբեջանակն ծառայողներին։ Սա է ինձ համար չափանիշը և ոչ թե այն, որ նրանք զինված ուժեր են կամ սահմանապահ զորքեր»,- նշել է Թաթոյանը։
Ինչ վերաբերում է ադրբեջանական դրոշների և ցուցանակների տեղադրմանը, Թաթոյանը նշել է, որ իրեն հաճախ էին ասում, թե ցուցանակը և դրոշն ի՞նչ կապ ունի մարդու իրավունքների հետ, մինչդեռ՝ շատ մեծ կապ ունի։
«Բա էդ դրոշների և ցուցանակների հարցերն են օգտագործում այդ ադրբեջանցիները ՝ որպես պատրվակ, բերում են իրենց զինված ուժերի ծառայողներին տեղակայում են այդ ցուցանակների մոտ, որ իբրև պահպանեն իրենց ցուցանակները, որ հայերը չվնասեն։ Մնում էր, որ ցուցանակների համար իրենք գային և սրբորեն պաշտպանեին իրենց ցուցանակները։ Ակնհայտ չէ՞, որ սա նաև պատրվակ է զինվորականներին տեղաշարժելու համար »,- ասել է Թաթոյանը՝ հավելելով, որ Շիկահող, Սրաշեն, Ճակատեն, Ներքին Հանդ գյուղերում մարդիկ խուսափում են անգամ երեկոյան ժամերին գնալ հիվանդանոց՝ ադրբեջանական զինված ուժերի պատճառով։
Փաստինֆո
