ՀՀ քաղաքացին հունիսի 7-ին հնարավորություն ունի պաշտպանելու ՀՀ ինքնությունն ու հայկական բովանդակությունը։ Այն Հայաստանը, որմ մենք ուզում ենք հունիսի 7-ից հետո , չի կարող նման նվաստացած վիճակում լինել։ Այս մասին այսօր՝ նախընտրական քարոզարշավի առաջին օրը, Երասխում հայտարարեց «Լուսավոր Հայաստան» կուսակցության առաջնորդ Էդմոն Մարուքյանը՝ իր թիկունքում ցույց տալով Ադրբեջանի պահանջով Երասխի մետալուրգիական գործարանի՝ կիսատ թողնված շինարարության հիմքերը։
«Հարևան պետությունը կրակելով արգելում է գործարան կառուցել ՀՀ ինքնիշխան տարածքում։ Մեր թիմը խոսում է այն խնդիրներից, որոնք պաշտպանելու են մեր պետականությունը։ Հունիսի 7-ին քվեարկելով մեր օգտին՝ դուք հնարավորություն եք ունենալու այս խնդիրները կարգավորել։
Ձեզ կասեն՝ 10 հազար դրամով թոշակներն ենք ավելացնում, մեկը կասի՝ ձեր դեղերն ենք էժանացնում, մյուսն ուրիշ բան կասի։ Իմացե՛ք, եթե անկախ հայկական պետականություն չունեցանք, չենք կարող որպես ազգ՝ պաշտպանված լինել ապագա ցեղասպանությունից»,- ասաց Էդմոն Մարուքյանը։
Վերջինիս թիմակից Կարպիս Փաշոյանն իր հերթին հավելեց, որ ՀՀ գործող իշխանությունները 8 տարի համոզում են, թե Հայաստանն ինքնիշխան է։
«Ղարաբաղը հանձնելուց հետո ասում են, որ Հայաստանը վերջապես վերագտել է իրեն, բայց Երասխի գործարանը վկայում է, որ Ադրբեջանն ու Թուրքիայն փորձում են վերահսկել իրավիճակը Հայաստանում։ Այսօր Երասխի այս գործարանը չեն թողնում կառուցել, վաղն ախորաժակը մեծանա, կարող է մի օր էլ չկարողանանք մտնել այստեղ։
Թուրքիան և Ադրբեջանը ներկա են մեր ներքին քաղաքական կյանքում, միջամտում են մեր ներքին գործերին, և դա պետք է կասեցնել։ Այս պահին ՀՀ ինքնիշխանության ամենամեծ թշնամիներն են Ադրբեջանը, Թուրքիան և նրանց կամակատար ՀՀ իշխանությունները։ Դրա համար անհրաժեշտ է քվեարկել մեզ, որպեսզի Հայաստանը կարողանա վերագտնել իր ինքնիշխանությունը»,- ասաց Կարպիս Փաշոյանը։
