Փաշինյանը Սամվել Կարապետյանին մեկուսացրեց շատ պարզ պատճառով. նա հասկանում է, որ եթե Կարապետյանը խառնվի քաղաքականությանը, իրավիճակը կտրուկ կփոխվի, 168.am-ի եթերում ասել է ՀՀ նախկին վարչապետ, «Միասին» շարժման համահիմնադիր Հրանտ Բագրատյանը։
«Ասում է՝ գոնե ՀԷՑ-ից զրկեմ։ Բայց կարծում եմ՝ ՀԷՑ-ը սուսուփուս հետ կտան Սամվել Կարապետյանին։ Կփորձեն չկատարել արբիտրաժի որոշումը. եթե կառավարեն, մեկ տարի հետո ՀԷՑ-ի պարտքերը հսկայական չափերի կաճեն։ Նրանք էին, որ մի կերպ կառավարում էին. հեշտ բան չէ ՀԷՑ-ը կառավարելը »,- ասաց Բագրատյանը։
Նախկին վարչապետը շեշտեց՝ Փաշինյանն ինքն իրեն կեղտի մեջ է գցել։
«Փոխանակ լուծի հանրապետության կայունության հարցերը, զբաղվում է ՀԷՑ-ով և եկեղեցով։ Եթե Էջմիածնի հրապարակ գնա, մենակ կմնա՝ իր «ախռանայի» հետ։ Ինքը ժողովուրդ չունի, թամաշա՞ է, որ ստիպել է նախարարություններին ժողովրդի ցուցակներ կազմել։
Ասենք՝ գնացել է Վեհարան։ Վեհափառին ո՞ւր են տանելու. քարշ է տալու, հանի՞։ Քրեական գո՞րծ կա, բա՞նտ են տանելու։ Այսինքն՝ նա մտնում է մի պատմության մեջ, որից ելք չունի»,- ասել է Բագրատյանը՝ մտահոգություն հայտնելով, որ կարող են քաղաքացիական բախումներ հրահրվել, ինչի ֆոնին էլ արտակարգ դրություն հայտարարվի, և «Զանգեզուրի միջանցքն» այդ պայմաններում հանձնվի։
