Վարչապետի աշխատակազմի ղեկավարը հաստատել է ՀՀ արտաքին հետախուզության ծառայության տարբերանշանի ձեւը: Ըստ «e-gov» հարթակում տեղադրված որոշման՝ տարբերանշանի բաղադրիչներն են՝ ՀՀ դրոշի հերթական գույները, գլոբուսի տեսք ունեցող ցանցային գրաֆիկական պատկերը, տեսասեւեռման գրաֆիկական պատկերը, աչքը, չափող թիրախի նշանացույցը, ութաթեւ արեւները։
«Դրոշի հերթական գույները խորհրդանշում են ՀՀ պետականությունը, որի կենսական շահերն է սպասարկում ծառայությունը: Գլոբուսի տեսք ունեցող ցանցային գրաֆիկական պատկերը խորհրդանշում է արտաքին հետախուզական գործունեության բնույթը՝ արտաքին աշխարհում պետությունների, անձանց, երեւույթների, իրադարձությունների, միավորումների, գաղափարների փոխկապակցվածությունը, որոնց իրական բնույթի ու նշանակության վերհանումը կենսական է արտաքին հետախուզական գործունեության համար: Տեսասեւեռումը խորհրդանշում է արտաքին հետախուզության շատ կոնկրետ թիրախային բնույթը։ Արտաքին հետախուզությունը կենտրոնացած է ոչ թե «արտաքին աշխարհում ամեն ինչի», այլ ՀՀ կենսական շահերի համար կարեւորություն ներկայացնող հարցերի վրա: Աչքը, որն ունի չափող թիրախի նշանացույց, խորհրդանշում է հետախուզության համար կարեւորություն ներկայացնող հարցերի խորքը տեսնելու հետախուզության նպատակը»,- ասված է որոշման մեջ:
Ս.Վ.
