Հայկական կողմը ի սկզբանե հայտարարել է, որ պատրաստ է դելիմիտացիայի և դեմարկացիայի հանձնաժողովի շրջանակներում աշխատել, սակայն կա մի կարևոր հանգամանք՝ Ադրբեջանի արտաքին գործերի փոխնախարարի հայտարարությունը հենված չէ որևէ իրավական փաստաթղթի վրա, այս մասին Հանրային հեռուստաընկերության եթերում հայտարարել է ՀՀ հատուկ հանձնարարություններով դեսպան Էդմոն Մարուքյանը՝ անդրադառնալով Ադրբեջանի փոխարտգործնախարար Խալավ Խալաֆովի հայտարարությանը, որ Տավուշի մարզի յոթ գյուղ, ինչպես նաև Արարատի մարզի Տիգրանաշեն գյուղը սահմանազատման ժամանակ պետք է վերադարձվի Ադրբեջանին։
«Ես կարող եմ հաստակ ասել, որ մինչ օրս Հայաստանի Հանրապետությանը չի ներկայացվել ՀՀ տարածքում գտնվող որևէ անկլավի վերաբերյալ որևէ իրավական հիմնավորում, որևէ իրավական փաստաթուղթ։ Տարատեսակ քարտեզներ են հրապարակվել ․․․ որևէ քարտեզ իրավական հիմնավորում չի համարվում առ այն, թե ում տարածքում ինչն է գտնվում պատկանող մյուս կողմի։ Որովհետև ցանկացած քարտեզի հիմքում պետք է լինի իրավական փաստաթուղթ, թե ինչպես է այդ քարտեզը գծվել»,– ասել է նա՝ հավելելով, որ երբ գործընթացը սկսվի, կողմերը պետք է միմյանց ներկայացնեն պահանջների իրավական հենք, քանզի եթե իրավական հենք չկա, ուրեմն չկա պահանջ։
«Հայկական կողմը բնականաբար պատասխանել է փոխարտգործնախարարին, որ Հայաստանի ձեռքի տակ չկա որևէ փաստաթուղթ, որ մեր տարածքում կան անկլավներ։ Մինչդեռ Ադրբեջանում եղած անկլավների վերաբերյալ կան իրավական հիմնավորումներ։ Հիմա կսկվեն բանակցությունները, դրանց ժամանակ յուրաքանչյուր կողմ իր ձեռքի տակ եղածը կներկայացնի։ Մինչև այսօր, որ չեն ներկայացրել, չեմ կարծում, թե որևէ ձևով իրավական հիմնավորում ունենալու են, որ ներկայացնեն։ Կներկայացնեն, կքննարկենք։ Այս պրոցեսը նրա համար է, որ հասկանանք, թե կողմներն իրար նկատմամբ ինչ պահանջներ ունեն և ինչպես են մեր սահմանները ճշտվելու»,–ասաց նա։
Էդմոն Մարուքյանը նշեց, որ մենք մի բան գիտենք Սոտք–Խոզնավար հատվածում, Տավուշի մարզի հատվածում, Սյունիքի, Գեղարքունի մարզում հենց հիմա ադրբեջանական զորքերը գտնվում են ՀՀ ինքնիշխան տարածքում և նրանք այդտեղից պետք է դուրս գան։ Սա եղել է Հայաստանի միանշանակ պահանջը և այն մնում է ուժի մեջ։ «Եվ բնականաբար այս հանձնաժողովի գործունեության ընթացում նաև այս հարցերը պետք է կարգավորվեն»,– ասաց նա։
Հարցին, թե քանի որ այս գործընթացը սկսվել է ԵՄ հովանու ներքո, արդյոք ճիշտ չի լինի նախքան Ադրբեջանի հետ գործընթացը սկսելը ճշտել սկզբունքները, քանզի դրանք կան ԵԱՀԿ կանոնադրությունում, Էդմոն Մարուքյանը պատասխանել է, որ երբ կողմերը հանդիպեն, պայմանավորվելու են աշխատանքի ոճի, սկզբունքների մասին, թե որոնք են համարվում աշխատանքային փաստաթղթեր և դրանք ինչ իրավական հիմքեր ունեն։
«Տրամաբանությունը հուշում է, որ դրանք որոշակի սկզբունքների վրա են լինելու։ Չի կարող սահման ճշգրտվել ուղղակի վերացական, մի կողմի բերած քարտեզի հիման վրա, եթե այդ քարտեզը չունի իրավական հիմնավորում։ Այդ քարտեզի տակ պետք է լինի իրավական փաստաթուղթ։ Եթե չկա, ուրեմն անցանք առաջ»,– ասաց նա։
