Հունվարի 27–ին Ադրբեջանի կողմից հայկական կողմին փոխանցված զոհված հայ զինծառայողի մարմինը նույնականացվել է. նա սեպտեմբերյան մարտերի ընթացքում զոհված Վահե Թորոսյանն է։
Հիշեցնենք, որ Վահեի ծնողները, համագյուղացիները հոկտեմբերից սկսած՝ բողոքի ակցիաներ են իրականացրել՝ ՊՆ-ից պահանջելով Սյունիքի Վերին հանդի հարակից տարածքից հանել վիրավոր Վահեին։ Տղան սեպտեմբերի 15-ին զանգահարել է տուն, խոսել, իսկ ընկերոջն ասել է, որ 3 տեղից վիրավոր է։ Այն տեղանքը, որտեղ սեպտեմբերի 13-15-ը տեղի են ունեցել ռազմական գործողությունները, և որտեղ գտնվել է վիրավոր Վահե Թորոսյանը, անցել է թշնամու վերահսկողության տակ։
Վահեի ծնողներին ՊՆ-ից բազմիցս ասել են, որ թշնամին անընդհատ կրակի տակ է պահում տեղանքը, չեն կարող հանել վիրավոր Վահեին։ Կարմիր խաչը նույնպես չի կարողացել օգնել վիրավոր զինվորին։
Ծնողները հանձն են առել ինքնուրույն գտնել իրենց որդուն, բայց ՊՆ-ը նրանց թույլ չի տվել մոտենալ տեղանքին։
Ադրբեջանցիները վիրավոր, բայց ո՞ղջ են գտել Վահեին, նա սպանվել է գերեվարության ժամանա՞կ․ հայտնի չէ։
