Արցախում հացի որոշ արտադրամասեր ալյուրի բացակայության պատճառով չեն գործում։ Փակվում են նաև առևտրի կետերը, խանութները։ Օպերատիվ շտաբը, որը համակարգում է պետնախարար Ռուբեն Վարդանյանը, փորձում է լրացուցիչ սնունդ հատկացնել։ Սննդի կետերի, խանութների մոտ հերթեր են գոյացել, բանկոմատների մեծ մասը կանխիկ գումար չունենալու պատճառով չի գործում, երեխաների համար նախատեսված սննդի բացակայության հետ կապված լուրջ խնդիրներն են առաջանում։ Ծնողներն ահազանգում են, որ միրգ-բանջարեղենի, վիտամինների պակասի պատճառով երեխաների թերսնուցումը կարող է ունենալ անդառնալի հետևանքներ. Արցախից ուղիղ կապով հայտնել է «Արդարություն» կուսակցության նախագահ, «Վերնատուն» երիտասարդական վերլուծական կենտրոնի հիմնադիր ղեկավար Արշակ Աբրահամյանը։
Նա դումում է սոցցանցերում հետևորդներ ունեցող օգտատերերին, հայտնի գործիչներին, արտերկրում միջազգային գործընկերներ ունեցող հայերին՝ Արցախի ու արցախահայության աղետալի վիճակի մասին հնարավորինս շատ տեղկություններ տարածել, միջազգային հանրությանն իրազեկել ու հորդորել խոսել Արցախի խնդրի մասին։
«Տարբեր լեզուներով տարածենք, որ Ադրբեջանը, Արցախը պահելով փրջափակման մեջ, իր ցեղասպան քաղաքականությունն է իրականացնում։
Օպերատիվ շտաբը որոշել է պահուստային ֆոնդից լրացուցիչ սնունդ հատկացնել, սակայն բոլորս էլ հասկանում ենք, որ այս վիճակը չի կարող երկար տևել։ Բլոկադան վերաբերում է նաև Արցախի Պաշտպանության բանակին։ Միանգամայն հասկանալի է, որ պահուստային սնունդը պետք է պահվի բանակի համար։ Սա գիտակցում են նաև արցախցիները։ Նրանցից շատերը հայտնել են, որ իրենք պատրաստ են նվազագույն չափով սնվել, միայն թե եղած սնունդը հատկացվի զինվորներին, բանակին»,- ասել է Արշակ Աբրահամյանը։
Ազգ-բանակ միասնությունը այս օրերին է հենց ստեղծվում Արցախում։ Շրջափակումը ոչ թե կոտրել, ընկճել է արցախցիներին, այլ, ընդհակառակը, պայքարի ոգին, ցասումը հասել է գագաթնակետին։
«Թող ադրբեջանցիները հիասթափվեն. իրենց քայլերի արդյունքում Արցախի ժողովուրդը չի կոտրվում, այլ պայքարում է ու ոչ մի դեպքում չի լքելու իր պատմական հայրենիքը»,-տեսաուղերձն ավարտել է Արշակ Աբրահամյանը։
