Ադրբեջանը մինչև հիմա չի վերադարձրել մեր տղաների, այդ թվում՝ իմ տղայի մասունքները. Միասնության հանրահավաքի ժամանակ ասաց 44-օրյա պատերազմում զոհված ժամկետային զինծառայող Հայկ Մելիքյանի մայրը՝ Նաիրա Մելիքյանը։
Նրա կարծիքով՝ եթե չլիներ 2018 թվականի թավշյա հեղափոխությունն ու իշխանության բռնազավթումը, ապա չէր լինի պատերազմ, և 5000 տղաները չէին զոհվի։
«Ես ամեն օր մտածում եմ՝ ինձ երբեք էլ մայրիկ չեն ասելու, ինձ երբեք տատիկ չեն ասելու, որովհետև իմ որդին զոհվեց՝ 20-ը չբոլորած։ Մի քանի օր առաջ լսում էի գրող Մերուժան Տեր-Գուլանյանին։ Նա ասաց՝ երբ 5000 տղա է զոհվում, որոնք դեռ սերունդ չէիր տվել, աստվածային ներդաշնակությունը խախտվում է, խախտվում է հողի, տիեզերքի ներդաշնակությունը։ Այսօրվա իշխանությունը մեր գլխին ամեն օր նոր պատուհաս է բերում, նոր ներդաշնակություն է խախտվում։
Ես հաճախ եմ ունենում հուսահատության պահեր, հատկապես երբ տեսնում եմ շատերի անտարբերությունը, ինքս ինձ ասում եմ՝ դու էլ ոչինչ չունես, երեխա էլ չունես, հանգիստ նստիր։ Բայց նույն վայրկյանին Արցախի հողը գոռում է, այն հողը, որի ամեն սանտիմետրը ներկված է արյամբ։ Մենք չենք կարող այդ հողը թշնամուն նվիրել»,- ասաց Նաիրա Մելիքյանը։
Հերոսի մայրը չի հավատում թուրքի հետ բարեկամությանն ու խաղաղությանը։ Ու հարց է տալիս. «Որևէ խելամիտ մարդ կարո՞ղ է հավատալ թուրքի հետ խաղաղության դարաշրջան բացելուն։ Մենք տեսանք մեր գերեվարված տղաների գնդակահարության կադրերը, մեր կանանց մասնատված մարմինները։ Թուրքը ստեղծվել է հային ոչնչացնելու առաքելությամբ, նա ցանկանում է ավարտին հասցնել այն, ինչը չհասցրեց 1915 թվականին։ Թուրքի հետ բարեկամությանը հավատացողներ, դուք կամ հայ չեք, կամ անմեղսունակ եք»-նշեց Նաիրա Մելիքյանը։
