44-օրյա պատերազմում զոհված զինծառայողների հարազատներն այս գիշեր մնալու են դրսում՝ բաց երկնքի տակ։ Հայրերի հետ նաև մայրերն են։ Նստացույց են անում. ուրիշ ճար չկա, նրանց խոսքն արհամարհված է, պահանջն՝ անտեսված։
Ժամը 14։00-ից հավաքվել էին Քննչական կոմիտեի մոտ, որպեսզի փաստաբանի միջոցով իրենց պահանջը հասցնեն կոմիտեի նախագահին, մյուս պատասխանատուներին։ Արդեն 8 ամիս է անցել. ոչ մի պատասխան։ Սեպտեմբերի 21-ին, Եռաբլուրում ոստիկանությունը բռնի ուժ կիրառեց զոհված զինվորների մայրերի նկատմամբ։ Ծնողները տեսագրությունները, լուսանկարները տրամադրեցին Քննչական կոմիտեին, որպեսզի 12 ոստիկանի նկատմամբ գործ հարուցվի, նախաքննություն սկսվի։ Առ այսօր ոչ մի ծպտուն։
Ինչպես հայտնի է, ոստիկաններն էլ իրենց հերթին են ծնողներին դատի տվել՝ իրենց օրինական պահանջը չկատարելու համար։
Զոհված տղաների հարազատներն ամբողջ օրը մի դատարանից մյուսն են վազում, որովհետև տարբեր դատական գործերում են ներգարվված։
Բայց այս պահին նրանց հուզում է այն, թե ինչու է 8 ամիս գործը քնել, ինչո՚՞ւ ոչ մի ոստիկան պատասխանատվության չի կանչվել, մեղավոր չի ճանաչվել։
Ժամը 15։30-ին ծնողների փաստաբան Վահան Հովհաննիսյանը բարձրացավ Քննչական կոմիտե, կարճ ժամանակ անց վերադարձավ ու հայտնեց՝ ասում են՝ խիստ զբաղված ենք, չենք կարող իջնել ու ծնողների հետ հանդիպել։
Ծնողներն էլ որոշեցին՝ 24-ժամյա նստացույց, չեն հեռանալու ՔԿ-ի տարածքից, մինչև որ սպառիչ պատասխան չլսեն՝ գործը ո՞ր փուլում է, ի՞նչ է արվել 12 ոստիկաններին պատասխանատվության ենթարկելու համար։
«Վարյութ նախաձեռնելուց անմիջապես հետո միջնորդություն եմ ներկայացրել, որ հանրային քրեական հետապնդում հարուցելու դեպքում որոշումն ինձ ուղարկեն, որպեսզի ես էլ այն փոխանցեմ ծնողներին։ 8 ամիս է անցել, ոչ մի որոշում չեմ ստացել»,- հայտարարեց փաստաբան Վահան Հովհաննիսյանը։
Ապրիլի 14-ին՝ ժամը 15։00, գիշերը Քննչական կոմիտեի մոտ լուսացրած ծնողները հայտարարությամբ են հանդես գալու։
Ժամը 21։00-ին ոստիկանական նոր ուժեր են բերվել ՔԿ։ Լուրեր են շրջանառվում, որ ոստիկաններն ինչ-որ գործողություն են կատարելու։
