Հայաստանի 10 մարզերում բնակվում է 80 հազարից ավելի բռնի տեղահանված արցախցի։ Տարածքային կառավարման և ենթակառուցվածքների նախարար Գնել Սանոսյանը ԱԺ-Կառավարություն հարցուպատասխանի ժամանակ նաև տեղեկացրեց, որ Հայաստան տեղափոխվելու առաջին օրերին են միայն արցախցիներն ապրել ընդհանուր կեցավայրերում, օրինակ՝ Արտաշատի մարզադպրոցի դահլիճում։ Իսկ այսօր այնտեղ ոչ ոք չկա այլևս։
«Մեր հայրենակիցները հիմնականում տեղակայված են անհատական տներում ու բնակարաններում։ Հյուրանոցներում ընդհանուր առմամբ կա 5000 մարդ։ 1400 մարդ ապրում է ընդհանուր հարմարեցված վայրերում։ 300 մարդ հյուրանոցներից տեղափոխվել է անհատական վարձով բնակարաններ։ Երբեմն վարձակալության տրվող բնակարանների գները շատ բարձր են, բայց մյուս երևույթի մասին էլ եմ ուզում խոսել և իմ շնորհակալությունը հայտնել։ Հանրապետությունում ունենք բնակավայրեր, որտեղ տասնյակներով տներ են տրամադրվել մեր հայրենակիցներին՝ անվճար»,- ասեց Սանոսյանը։
Մարզում տեղակայված 80 հազար արցախցիների խնդիրներին նախարարությունը տեղյակ է։ Սանոսյանը հավաստիացրեց, որ Գիտեն՝ նրանցից քանիսի սնունդն է հյուրանոցը տրամադրում, քանիսինը՝ մասնավոր ընկերությունները։ Գիտեն ընտանիքների, երեխաների թիվը. քանիսն է դպրոց հաճախում, քանիսը դեռ պետք է հաճախի, քանի մարդ ունի առողջական խնդիր։ Կարիքների գնահատում է արվել, ինֆորմացիան հայտնի է։
