Հաճախ՝ սկսած 2019 թվականից, երբ ես ընտրվել եմ ԱԺ պատգամավոր, և այն ժամանակ գործունեություն էի ծավալում ԱԺ տնտեսական հարցերի հանձնաժողովում, ես իմ գործունեությամբ խանգարել եմ մի շարք գործունեության տեսակների, այսօր լրագրողների հետ զրույցում նշեց ԱԺ ՔՊ–ական պատգամավոր Հայկ Սարգսյանը։
«Դրանց շարքում առաջինը խաղային ոլորտն է։ Ես դա համարում եմ չարիք ու մշտապես խոսել եմ դրա մասին։ Իմ այդ հրապարակային աշխատանքից հետո ես թիրախավորվել եմ։ Ես կարծում եմ, որ դա հիմնականում խաղային ոլորտին սպասարկող անձանց կողմից է եղել այդ գրոհը։ Ինձ շարունակաբար մեղադրել են տարբեր հանցագործությունների մեջ՝ սկսած քրեական աշխարհի հետ կապ ունենալուց, սկսած թմրամիջոցների բիզնեսի հետ կապ ունենալուց, փորձելով ինձ կապել տարբեր սպանությունների ու ինքնասպանությունների հետ։ Ես փորձել եմ մեծամասամբ չանդրադառնալ այդ հարցերին, բայց այսօր պատրաստ եմ այդ բոլոր հարցերին պատասխանել»,–ասաց նա։
