Եկեղեցու դեմ արշավով և հոգևորականներին ձերբակալություններով հարվածում են ինքնության հիմքերին, լրագրողների հետ զրույցում այսօր ասաց ՊԵԿ նախկին նախագահ Դավիթ Անանյանը։
«Ինչո՞ւ եմ ասում ինքնության հիմքերին, որովհետև Հայ եկեղեցին այն համազգային կառույցն է, որը 1700 տարվա անխափան գործունեություն ունի։ Պետականության կորուստներ ենք ունեցել, իսկ Հայ Առաքելական եկեղեցին ունեցել է անխափան պատմություն։ Դարեր շարունակ եկեղեցին պահպանել է մեր ինքնությունը։
Մի կողմից կա հասարակություն, կան հարգանքի արժանի քաղաքացիական անձինք, բայց կան նաև բարձրաստիճան հոգևորականներ, որոնք իրենց քարոզներով փորձում են ուղղորդել հայությանը»,- ասաց Անանյանը։
Նա միաժամանակ չհամաձայնեց իշխանությունների տարածած այն տեսակետի հետ, որ այսօրինակ գործողությունների միտումը մեկն է՝ բարեփոխել Առաքելական եկեղեցին։
«Նրանց ասածում բարցարձակապես օբյեկտիվություն չկա, չկա ճշմարտություն։ Ահազանգելու իրավունք բոլորս էլ ունենք, բայց դա արվում է խոնարհաբար։ Եթե եկեղեցու ներսում խնդիր կա, բարձրացրու այն, բայց հավատավոր զավակի խոնարհությամբ և խնդրիր հոգևոր առաջնորդին՝ թույլ տալով, որ եկեղեցին ներքին կանոնակարգերով լուծի այդ խնդիրները։ Վարքագիծն այսպիսին պետք է լինի։
Այժմ այս ամենը քաղաքական ղեկավարի կողմից ակնհայտորեն արվում է միմիայն քաղաքական նպատակներով, նաև ազգը մասնատելու հստակ մտադրությամբ»,- ամփոփեց Անանյանը։
