«Դիմադրություն» շարժման իրազեկման ակցիան այսօր ավարտվեց Ազատության հրապարակում, վաղը անհնազանդության ակցիաներն ու երթերը կշարունակվեն: Վաղը իրազեկման երթը կմեկնարկի 18:30-ին Գարեգին Նժդեհի արձանի տարածքից, այս մասին ցուցարարներին տեղեկացրեց ԱԺ փոխնախագահ Իշխան Սաղաթելյանը՝ հավելելով, որ Ազատության հրապարակում քիչ անց տեղի կունենա համերգ:
Իշխան Սաղաթելյանը անդրադարձավ նաեւ այսօր երեկոյան տեղի ունեցած դժբախտ պատահարին եւ ասաց, որ Նիկոլ Փաշինյանը ոչ միայն դավաճան է, այլ նաեւ մարդասպան:
«Քիչ առաջ մի դժբախտություն է տեղի ունեցել մեր քաղաքում, վարչապետի աթոռին հայտնված անձի շարասյունը վթարի է ենթարկել հղի կնոջը, սա ոչ միայն դավաճան է, այլ մարդասպան, սա անընդհատ զոհերի, պարտության սիմվոլ է, սա անընդունելի է, սրա համար պետք է բացատրություն տան ու հատ-հատ պատիժը կրեն: Մենք չենք հանդուրժելու, ժողովրդի միջից դուրս եկածը տեսեք` ինչերով է ման գալիս եւ ինչ փորձանքներ ու սպանություններ է անում: Նիկո՛լ, դու նաեւ մարդասպան ես, որը արյունի կարոտ է, քեզ պետք է պատժել սրա համար»,-ասաց Սաղաթելյանը:
Հիշեցնենք, որ երթն այսօր մեկնարկել էր Սասունցի Դավթի Արձանի տարածքից, Հանրապետության հրապարակում երթին են միացել Արթուր Վանեցյանը եւ նրա աջակիցները:
Ապակենտրոն ակցիաների շրջանակում այսօր «Հայաստան» խմբակցության պատգամավոր Աննա Գրիգորյանն ու մի շարք քաղաքացիներ Արարատի մարզի Տիգրանաշեն համայնքից երթով գալիս են Երևան։ Երեկ նման քայլերթ է սկսվել Իջևան քաղաքից, որն այսօր շարունակվել է։
News.am
