Պետությունը բազմաթիվ հանձնառություններ ունի էներգախնայման համակարգը Հայաաստանում զարգացնելու շրջանակներում, սակայն սա բավականին մեծ ֆինանսական ռեսուրսներ պահանջող ոլորտ է, այսօր տեղի ունեցած մամուլի ասուլիսի ժամանակ ասաց ՀՀ տարածքային կառավարման և ենթակառուցվածքների նախարարության էներգետիկ տարածաշրջանային շուկաների բաժնի պետ Հովհաննես Աբրահամյանը։
Ըստ նրա՝ աջակցման աշխատանքներում մեծ ներդրում ունեն տեղական և միջազգային գործընկերները՝ ԵՄ-ն, ՄԱԿ-ը և այլն։
Բանախոսն ուշադրություն հրավիրեց այ հանգամանքի վրա, որ պետությունն այս փուլում չի խոչնդոտում, որպեսզի քաղաքացիները արևային կայաններ տեղադրեն։
«Սուբսիդավորման ծրագիրն, իհարկե, ավարտվել է. պետությունը չի սուբսիդավորում, բայց նաև չի խոչընդոտում, որ մարդիկ տեղադրեն, սակայն մինչև 7-8 տարի հնարավորություն կտրվի, որպեսզի մարդիկ իրենց արտադրած էլեկտրաէներգիայի ավելցուկը կուտակեն՝ օգտագործելով նաև ձմռան ամիսներին։
Սակայն դրանից հետո անցում է կատարվելու ամսական հաշվարկի սկզբունքին, այսինքն՝ յուրաքանչյուր ամիս արտադրած և սպառած էլեկտրանէներգիայի վերջնահաշվարկ է իրականացվելու, որի արդյունքներով՝ եթե քաղաքացին ավելի շատ արտադրել է, քան սպառել, այդ մասով նրան փոխհատուցում է տրվելու, իսկ հակառակի դեպքում քաղաքացին վճարելու է ՀԷՑ-ին»,- բացատրեց Հովհաննես Աբրահամյանը։
Հարցին՝ երբ է նախատեսվում, որ պետությունն արդեն կունենա կուտակիչ կայանների մասով օրենք, բանախոսը պատասխանեց՝ պետությունն այժմ ակտիվ աշխատանքներ է տանում էլեկտրաէներգետիկայի մասին նոր օրենքի նախագիծ ընդունելու ուղղությամբ։ Կուտակիչ կայանների հարցն այդ նախագծում նախատեսված է։
