Լույս է տեսել գիտնական, ակադեմիկոս, Ռուսաստանի բնագիտության ակադեմիայի պրոֆեսոր, «Ազգ» թերթի երկարատեւ աշխատակից Ստեփան Պապիկյանի «Էներգետիկ անվտանգության եւ արդյունավետության բարձրացման ուղիները» մենագրությունը: Այն երաշխավորվել է տպագրության ՀՀ ԳԱԱ տնտեսագիտության ինստիտուտի գիտխորհրդի կողմից:
Հարկ է նշել, որ վառելիքաէներգետիկ ռեսուրսների խնայողության, շրջակա միջավայրի պաշտպանության տեսակետից կարեւոր նշանակություն ունի ՀՀ-ում էներգետիկ անվտանգության եւ արդյունավետության բարձրացումը, այդ թվում թվային Էներգետիկայի զարգացումը: Այն հնարավորություն կտա լուծելու էներգահամակարգի հուսալիության, վառելիքաէներգետիկ ռեսուրսների խնայողության, տնտեսագիտական եւ բնապահպանական բազմաթիվ խնդիրներ:
Առաջարկվում է Հայաստանի էներգետիկ համակարգում աստիճանաբար անցում կատարել թվային տեխնոլոգիաների, որի դեպքում կունենանք միջազգային չափանիշներին համապատասխանող փոքր կորուստներով շահագործվող էներգահամակարգ:
Հիմնավորված է, որ էներգետիկ անվտանգությունը էներգահամակարգերի շահագործման կառավարման նոր ձեւաչափ է: Առաջարկվում է ՀՀ էներգահամակարգում ստեղծել համապատասխան բազա: Հարկ է նշել, որ մենագրությունում բազմաթիվ հղումներ կան «Ազգ» շաբաթաթերթին, որտեղ հեղինակը տարիներ շարունակ հեղինակել է էներգետիկայի բնագավառի հիմնախնդիրները եւ դրանց լուծման ուղիները:
Մշակվել է մեթոդիկա ջեռուցման ՋԷԿ-երից եւ կաթսայատներից ջերմության առաքման ամսական ռեժիմների վերլուծության եւ պլանավորման համար՝ հաշվի առնելով ելակետային տվյալների անորոշությունը: Հաշվարկի արդյունքները տրվում են միջակայքի տեսքով:
Հեղինակի կողմից առաջարկվող մեթոդիկան հնարավորություն է տալիս լուծել ջերմային էներգիայի արտադրության պլանավորման հարցը, վարել սակագնային ճիշտ քաղաքականություն, գոյություն ունեցող կոշտ թվերից անցում կատարել սահուն թվերին, ճշգրիտ գնահատել սպառողին տրված ամսական ջերմային էներգիայի քանակությունը եւ ջեռուցման շրջանի վերջում կատարել վերահաշվարկ: Այն հնարավորություն կտա կանոնավորելու եւ կարգավորելու ջերմային էներգիայի առաքման ռեժիմները:
Առաջարկվում է էներգետիկական անվտանգության հարցերի գնահատման համար կիրառել էներգետիկական անվտանգության գործակից հասկացությունը: Այն ցույց է տալիս, թե տվյալ բնակավայրի հեռանկարի համար անհրաժեշտ էներգիայի ո՞ր մասն է փակվում տեղական ռեսուրսների հաշվին: Կարեւորվում է նաեւ էներգետիկ անվտանգության թույլատրելի նվազագույն միջակայքի իրականացման անհրաժեշտությունը: Արժեքավոր գիտական աշխատությունը անշուշտ կնպաստի բնագավառի հետագա զարգացմանը:
Նախատեսվում է ոչ միայն գիտնականների, ուսանողների, այլ նաեւ բնագավառով զբաղվողների համար:
