Հունիսի 8-ին Բեռլինի և Բրանդենբուրգի հայ երիտասարդական միությունը (Armenische Jugend Berlin & Brandenburg) առաջին անգամ մասնակցել է Բեռլինում անցկացվող Մշակույթների կառնավալին (Karneval der Kulturen 2025 Berlin): 1996-ից անցկացվող քառօրյա այս գունեղ միջոցառման բարձրակետը բացօթյա շքերթն է, որին այս տարի մասնակցել է մոտ 70 մշակութային խումբ՝ երգ, պար, թատերական արվեստ ներկայացնող 4000 ակտիվ մասնակցով: Դուդուկի, զուռնայի, դհոլի հնչյուններին ի պատասխան հայկական ազգագրական պարերի տպավորիչ կատարումներով շքերթին մասնակցել են Բեռլինի, Համբուրգի, Մյունխենի և Բրեմենի հայ մշակութային խմբերը:
Մշակութային բազմազանություն ու համակեցություն խորհրդանշող այս կառնավալին Հոգեգալստյան կիրակի օրը հետևել է ավելի քան 750.000 հանդիսատես:
Բեռլինի և Բրանդենբուրգի հայ երիտասարդական միության անդամները, Բեռլինի, Համբուրգի, Մյունխենի և Բրեմենի պարախմբերի հետ մշակել են «Դիմակայելու արվեստը՝ ճանապարհորդություն Հայաստանով» վերնագրով պարային բեմադրությունը, եւ, ինչպես մեզ հետ զրույցում մեկնաբանեցին, վերնագրի ընտրությունը շատ բնական է՝ «հայի գոյությունը մեր նախնիների ընդվզման, դիմակայելու ապացույցն է»:
«Հայեր միացե՛ք, միացե՛ք հայեր, Արցախն է ձեզ կանչում, օգնության հասեք» երգի հնչյունների ներքո, Հայաստանի տարբեր գավառների տարազով հայ երիտասարդների խրոխտ պարը, ինչպես նաեւ Արցախի մեծ դրոշի առկայությունը հանգիստ չի տվել ադրբեջանցիներին: Նրանք բողոքել են փողոցում ներկա ոստիկաններին՝ պահանջելով հեռացնել «այն դրոշը, որ գոյություն չունի»: Հայ երիտասարդները բացատրել են, որ Արցախի դրոշը հայ մշակույթի եւ ինքնության մաս է, ուստի այն պետք է լինի, իսկ գերմանացի ոստիկանները ստուգել են, համոզվել, որ այն Գերմանիայում եւ այլուր արգելված չէ, ուստի չեն բավարարել ադրբեջանցիների պահանջը:
Շատ դրվատելի է, որ երիտասարդներին մենակ չեն թողել՝ շատ հայեր, հատկապես Բեռլինի հայ համայնքը սատարել են ֆինանսապես եւ որ առավել կարեւոր է, նրանց անվտանգության մասին հոգ տանելով:
Համայնքը զորավոր է, հայե՛ր, միացե՛ք:
ԱՆԱՀԻՏ ՀՈՎՍԵՓՅԱՆ, Գերմանիա
