Ավելի քան երեք տասնամյակ ադրբեջանցի և հայ ժողովուրդներն այլ մարդկանց աշխարհաքաղաքական խաղերի և մանիպուլյացիաների պատանդն են եղել. այսպես է սկսվում ադրբեջանական Report-ը Յութուբում տեղադրված ադրբեջանական հայալեզու տեսանյութի մասին կեղծ քարոզչական հայտարարությունը։
Տեսանյութն, ի դեպ, Բաքվի հեռուստաընկերությունն է պատրաստել։
Նշվում է, որ իբր երկու ժողովուրդներն էլ կարող են միասին ապրել խաղաղության և ներդաշնակության մեջ՝ չնայած պատերազմի ծանր հետևանքներին։
Իբր հիմա էլ Բաքվի հենց կենտրոնում կա հայկական եկեղեցի, և էթնիկ հայեր են ապրում Ադրբեջանի տարբեր շրջաններում։ Հղում անելով տեսնյութին՝ ադրբեջանական լրատվամիջոցը նշում է. «Մենք պատմական հնարավորություն ունենք միասին վերականգնելու Ղարաբաղը, այն վերածելու բարեկեցիկ, տնտեսապես զարգացած տարածաշրջանի, և որ ամենակարեւորն է՝ ապահովելու մեր երեխաների ու թոռների երջանիկ ապագան»։
Այս հեքիաթ-տեսնյութը Յութուբում տեղադրվել է ճիշտ նույն ժամանակամիջոցին, երբ Ադրբեջանը հարձակվել է Արցախի վրա ու մեծածավալ պատերազմ սկսել։
Բաքուն մի ձեռքով հայերին սիրաշահող, «արցախցիներին ադրբեջանցիների հետ սիրով ու համեշախ կերպով ապրելու» կոչ է անում այս հեքիաթ- տեսանյութով, մյուս ձեռքով օդից ու ցամաքից հարձակվում Արցախի վրա ու սկսում ցեղասպանել 4 կողմից շրջափակման մեջ գտնվող արցախցիներին։
Այս պրիմիտիվ, մանկամիտ քարոզչությամբ Բաքվի բռնապետն իր հոր արևին ուզում է խայծը գցել՝ հույս ունենալով, թե Բաքվի, Սումգայիթի, Նախիջևանի, Արցախի ցեղասպանություն տեսած հայերը հավատալու են իրեն ու սկսեն ադրբեջանցիների հետ «հաշտ ու խաղաղ» ապրել Արցախում, որը նա համարում է Ադրբեջանի անբաժան մաս։
Բաքվի բռնապետն իր հոր արևին խորամանկության է դիմել՝ դիտավորյալ տեսանյութը հայերեն է պատրաստել տվել, որ իր պրիմիտիվ քարոզչությունը հայերն իրենց մայրենի լեզվով լսեն ու ի կատար ածեն։
Ջիվանին կասեր՝ խելքի աշեցեք…
Ադրբեջանական հեքիաթ-տեսանյութը հրապարակելու համար Azg.am-ը հայցում է ընթերցողների ներողամտությունը։
Պարզապես տեսնել էր պետք այս աղբը։
