Առաջիկա երկու շաբաթների ընթացքում Սահմանադրական փոփոխությունների խորհուրդը նիստ կհրավիրի, այսօր լրագրողների հետ զրույցում ասաց Արդարադատության նախարար Սրբուհի Գալյանը։
Սահմանադրության նոր տեքստը, սակայն, ըստ Գալյանի՝ առայժմ ամբողջությամբ պատրաստ չէ։
«Տեքստի մշակմանն ուղղված գաղափարական հիմնադրույթների շուրջ պետք է քննարկում տեղի ունենա։ Երբ ունենանք համապատասխան որոշումները՝ խորհրդի համաձայնության տեսքով, արդեն կլրամշակենք տեքստն և կվերջնականացնեք։ Ժամկետներ մեր մտքում կան։ Ժամանակին նշել եմ, որ կփորձենք տասը ամսում ամփոփել տեքստի մշակման աշխատանքները։ Փորձում ենք այդ ժամկետները պահել»,- նշեց նա։
Նախարարը միաժամանակ նշեց, որ խորհրդի հետ քննարկվելու է նաև Անկախության հռչակագրի վերաբերյալ հարցը։
«Բոլոր հարցերը պետք է խորհրդի հետ քննարկման առարկա դառնան»,- նշեց Գալյանը։
Հարցին՝ կիսո՞ւմ է Անկախության հռչակագրի մասին Նիկոլ Փաշինյանի հայտնած այն դիրքորոշումը, որ նոր Սահմանադրության տեքստում չպետք է հղում լինի Անկախության հռչակագրին, նախարարը պատասխանեց՝ իր կարծիքով՝ դա քննարկման առարկա է։
