Անկախ նրանից, որ օրվա իշխանությունն իրականացնում է հակահայ քաղաքականություն, թշնամու օրակարգի շրջանակներում կեղծ խաղաղության օրակարգի ներքո զիջումների է գնում, այդ թվում՝ նաև ԵԱՀԿ Մինսկի խմբի լուծարման մասով, որևէ կերպ չի կարող և անհնար է, որ Արցախի ժողովրդի հիմնարար՝ վերադարձի իրավունքը անտեսվի և ստորադասվի։ Լրագրողների հետ զրույցում այսօր այս մասին ասաց ԱԺ «Հայաստան» խմբակցության պատգամավոր Արծվիկ Մինասյանը։
«Իշխանափոխությունից հետո լինելու է օրակարգային գլխավոր հարց, և այն հիմնվելու է, այո՛, նախևառաջ միջազգային իրավունքի, դիվանագիտական համակարգերի, ՀՀ բարեկամ պետությունների օրակարգային հարցի վրա, և այդ օրակարգային հարցը լինելու է նաև երրորդ որևէ երկրների հետ հարաբերություններում կարևոր նախապայման։
Այդպիսի երկրները բազմաթիվ են թե՛ Արցախի, թե՛ Հայաստանի և հայ ժողովրդի բարեկամների շրջանում։ Հայ Դատի գրասենյակների աշխատանքը ցույց է տալիս, որ բազմաթիվ երկրներում մարդկանց և ժողովուրդների հիմնարար իրավունքները հարգող գործիչներ կան, որոնք պատրաստ են այդ հարցում համագործակցել և ապահովել, որպեսզի հայ ժողովրդի կենսական այս իրավունքը կրկին դառնա միջազգային օրակարգի հարց և վերածվի իրական գործողությունների։
Խոսքն ամենևին չի գնում, ինչպես Փաշինյանն է փորձում սպառնալ, վախեցնել ժողովրդին պատերազմի ճանապարհով, այլ նախևառաջ անհրաժեշտ է, որ այն, միջազգային իրավունքի տեսակետից ընկալելի և ճանաչելի դառնալով հանդերձ, ունենա նաև միջազգային գործիքակազմ, և մենք ունենք այդ հնարավորությունը»,- ասաց Արծվիկ Մինասյանը։
