Ավանի Աղի կոմբինատի բանվորների աշխատավարձը վերջին 25 տարիների ընթացքում չի ավելացել, նույնիսկ նվազել է։ 300 մետր գետնի տակ իջնող հանքագործները ստանում են 100-120 հազար դրամ, չունեն առողջապահական ապահովագրություն, իսկ աշխատանքային պայմաններից բողոքողներին տնօրենությունն առաջարկում է ազատման դիմում գրել կամ սպառնում է փակել գործարանը։
«Տեսա Քաջարանի կոմբինատի գործադուլից ձեր վիդեոները ու բարկացա։ Աղի հանքում աշխատավարձերը նույնպես շատ ցածր են», – Epress.am-ին պատմել է կոմբինատի աշխատակիցը, ով ցանկացել է մնալ անանուն։
Նրա խոսքերով՝ 2019 թվականին գործադուլ արած ակտիվ աշխատակիցներից մեկին գործից հեռացրել են, հիմա մյուսները վախենում են բարձրաձայնել իրենց վատ պայմանների մասին։
Հանքափորների վերջին գործադուլը վեց տարի առաջ է եղել՝ աշխատավարձի բարձրացման պահանջով։ «Աղի կոմբինատ» ՓԲԸ-ի տնօրեն Արեգ Ղուկասյանն այն ժամանակ ասել էր, որ գործարանը վնասով է աշխատում, սպառնացել էր, որ, եթե շատ բողոքեն, կփակվի ընդհանրապես։ Տարիներ անց, սակայն, ոչ մի փոփոխություն տեղի չի ունեցել։
Ձմռանը, ըստ հանքագործի, մի քիչ ավելի լավ է․ աղը տանում են շրջաններ՝ սառույցի վրա լցնելու համար, դրա համար իրենք ստանում են 120 հազար դրամ։ Տաք եղանակին աշխատավարձը 20 հազարով պակասում է։
«300 մետր իջնում ենք գետնի տակ, աղը տրաքացնում ենք, աղում։ Վտանգավոր ու ծանր գործ է, բայց էդ ցածր աշխատավարձի հետ գոնե առողջապահական ապահովագրություն ունենայինք։ Հիմա ամեն տեղ նենց գներ են, որ էդ գումարը ոչ մի բան է», – բողոքել է հանքագործը՝ նշելով, որ չի էլ հիշում, թե վերջին անգամ երբ են վերանայել աշխատավարձը։
Փոխարենը, 2018-ին Աղի կոմբինատի տնօրենը հայտարարել էր, որ աշխատակիցների միջին աշխատավարձը 180 հազար դրամից կդառնա 160 հազար դրամ։
«Մի քանի օր առաջ բանվորները նորից բողոքել են, տնօրենությունից ասել են՝ ուզում եք՝ ուզեք, չեք ուզում՝ դուրս եկեք», – նշել է կոմբինատի աշխատակիցը։
Աղբյուր՝ epress.am
