Կարծում եք՝ ՔՊ-ն չգիտե՞ր այդ ձայնագրությունների իրական բովանդակության մասին. երկու տարի շարունակ հետևել են Սրբազան շարժման ակտիվ դերակատարների խոսակցություններին և տեղաշարժին։ Սակայն չեն կարողացել գտնել մի փաստ, վերցրել են մոնտաժված ձայնագրությունները, պոլի փետը, կոշիկի մեխը և դրա վրա փորձել են կառուցել հեղափոխություն։ Բագրատ սրբազանի և մյուսների գործով դատական նիստից առաջ լրագրողների հետ զրույցում այս մասին ասաց ԱԺ «Հայաստան» խմբակցության պատգամավոր Գառնիկ Դանիելյանը։
«Չհավատաք թրքահպատակ իշխանությունների կեղծ, շինծու մեղադրանքներին։ Այս գործը փուչիկ ա, որն արդեն տրաքել ա։ Ստացվում է այնպես, որ Հայաստանի Հանրապետությունում այլախոհությունը կամ ընդդիմադիր լինելը քրեորեն պատժելի արարք է։ Բացի ընդդիմադիր լինելը, եթե պատերազմի մասնակից ես՝ հոդվածը գնաց, Արցախի անունը տալիս ես՝ հոդվածը գնաց. էս ապիկարների հետ խոսելու բան չկա»,-ասաց պատգամավորը՝ նշելով, որ մեղադրվող մարդիկ ազգի նվիրյալներ են։
Գառնիկ Դանիելյանը միաժամանակ նշեց՝ ակտիվ խոսակցություններ են գնում, որ Սրբազանի պայքարի շրջանակում սեպտեմբերին՝ աշնանային նստաշրջանին, իրեն և Իշխան Սաղթելյանին պետք է անձեռմխելիությունից զրկեն, քրեական գործ հարուցեն։
