Ադրբեջանի պետական նավթային ընկերությունը հերքել է Հայաստանում բիտումի արտադրության հայ-ռուսական գործարանը գնելու մասին տեղեկատվությունը: Ընկերության հասարակայնության հետ կապերի վարչության պետի տեղակալ Իբրահիմ Ահմեդովը Trend-ին հայտնել է, որ նման պնդումներն անհեթեթ են և անհամատեղելի SOCAR-ի մասշտաբների հետ: Պարզվում է՝ ընկերությունը հետաքրքրված չէ Հայաստանով։
«Ընկերությունը բիտումի արտադրամասի կարիք չունի Հայաստանի որևէ տարածքում և ընդհանրապես հետաքրքրված չէ այդ երկրով»,- ասել է Իբրահիմը ու հիշեցրել, որ SOCAR-ը Ադրբեջանի գլոբալ բրենդն է, Թուրքիայի խոշորագույն օտարերկրյա ներդրողը, Ադրբեջանի և Վրաստանի ամենամեծ հարկատուն, խոշոր միջազգային նախագծերի առաջատար ընկերությունը։
Այսօր հայկական օրաթերթերից մեկը գրել էր, թե Սուրենավանում գտնվող հայ-ռուսական բիտումի գործարանից տեղեկություն է ստացվել, որ ադրբեջանական նավթային SOCAR ընկերությունը գործարանը գնելու բանակցություններ է վարում՝ վրացի միջնորդների օգնությամբ։ Գործարանն արդեն մոտ մեկուկես տարի է՝ գրեթե լուծարված է։
Քաղաքագետ Անդրանիկ Հովհաննիսյանի պնդմամբ՝ ադրբեջանական ընկերության կողմից բիտումի գործարան գնելու մասին լուրերը Հայաստանի իշխող ուժի կողմից նպատակաուղղված տեղեկատվական հոսք է։
«Այս սադրանքի նպատակն է ստուգել հանրության արձագանքը նման տեղեկատվությանը և աստիճանաբար Հայաստանի քաղաքացիներին նախապատրաստել այն բանին, որ ոչ միայն գործարանները, այլ նաև այլ օբյեկտներ շուտով ձեռք կբերեն թուրք-ադրբեջանական շահագրգիռ գործարարների կողմից»- տելեգրամի իր ալիքում գրել է Հովհաննիսյանն ու հավելել, որ «Օվերտոնի պատուհանը» Հայաստանում բաց է։
Հիշեցնենք, որ Սյունիքի մարզում Գորիս-Կապան ավտոճանապարհը զավթած ադրբեջանցիները ոչ միայն մաքսակետ են տեղադրել, այլ նաև այդտեղ տեղադրել SOCAR-ի բենզալցակայան։
Աղբյուր` Փաստինֆո
