Սամվել Կարապետյանը ՀՀ քաղաքացի է, բայց ոչ միայն ՀՀ քաղաքացի. իսկ մեր օրենսդրության համաձայն՝ միայն ՀՀ քաղաքացին կարող է լինել կառավարության անդամ, պատգամավոր և այլն։ Հետևաբար այն հարցը, որ Սամվել Կարապետյանը Պուտինի կողմից է ուղարկվել՝ վաչապետ դառնալու, այդ հարցը կարող ենք դնել մի կողմ, այսօր կայացած մամուլի ասուլիսի ժամանակ ասաց փաստաբան Արամ Վարդևանյանը։
Նա միաժամանակ հիշեցրեց, որ Սամվել Կարապետյանն իր գործունեությամբ Ադրբեջանի կողմից ընկալվում է մարդ, ում նկատմամբ այդ երկիրը ցանկանում է քրեական հետապնդում իրականացնել։
«Մի հատ էլ չեն զլանում՝ հետախուզում են հայտարարում։ 2025 թվականի հունիսի 18-ին ՀՀ-ն իրավական ռեպրեսիվ ողջ համալիրն իրականացնում է Սամվել Կարապետյանի նկատմամբ՝ թե՛ անձնական ազատության իրավունքի ,թե՛ սեփականության իրավունքի, թե՛ արդար դատաքննության իրավունքի մասով։ Արդյոք պատահականություն է այդ ամենը, թե ոչ, եկեք ես դատողություն չանեմ, բայց առնվազն ֆիքսենք փաստական տվյալ. Ադրբեջանի համար Սամվել Կարապետյանը հանդիսանում է հետապնդման, հետախուզման ենթակա անձ։
2025 թվականի հունիսի 18-ին Սամվել Կարապետյանը ՀՀ իրավապահների և գործադիրի ղեկավարի խոստման արդյունքում հանդիսանում է քրեական հետապնդման ենթարկվող, ապօրինի կալանքի մեջ գտնվող անձ։ Այն, որ կալանքն էլ, հետապնդումն էլ ակնհայտ ապօրինի են, անզեն աչքով նկատելի է։ Այն, որ այստեղ քրեական գործ չկա, անկհայտ է։ Այն, որ այս խափանման միջոց կալանքը վերացվելու է, համոզված եղեք։ Այն, որ այս քրեական հետապնդումն ի վերջո իր տրամաբանական ավարտն է ունենալու, դրանում էլ համոզված եղեք»,- ամփոփեց Արամ Վարդևանյանը։
