Ադրբեջանի նախագահի օգնական Հիքմեթ Հաջիևը սլովակյան «Hospodárske noviny» հրատարակությանը տված հարցազրույցում անդրադարձել է Ադրբեջանի և Հայաստանի միջև հարաբերությունների կարգավորմանը։
«Նախևառաջ ուզում եմ ընդգծել, որ Հայաստանի և Ադրբեջանի միջև արդեն խաղաղություն է։ Պատերազմն ավարտվել է։ Երբ նայում ես մեր սահմաններին, ամենուրեք տեսնում ես խաղաղություն և կայունություն։ Ես նույնիսկ կասեի, որ տարածաշրջանում հաստատվել է նոր ստատուս քվո՝ հիմնված օրինականության և լեգիտիմության վրա: Մենք համաձայնության ենք եկել խաղաղության համաձայնագրի տեքստի շուրջ։ Դուք կարող եք խաղաղություն ունենալ թղթի վրա, բայց տեղում իրավիճակը երբեմն բոլորովին այլ է: », – ասել է Հիքմեթ Հաջիևը։
Հաջիևը պատմել է, որ խաղաղություն է, հայ-ադրբեջանական սահմանը կայուն է, «Ղարաբաղն այլևս օրակարգում չէ»։
Սակայն այս ամենին ավելացրել է. «Սակայն, որպեսզի խաղաղության համաձայնագիրը վերջապես ուժի մեջ մտնի, անհրաժեշտ է մեկ վերջին քայլ։
Մենք ակնկալում ենք, որ Հայաստանը կփոխի իր սահմանադրության տեքստը, որը դեռևս պարունակում է Ադրբեջանի նկատմամբ տարածքային պահանջների վերաբերյալ կետեր: Ամեն դեպքում, լավ է, որ մենք պահպանում ենք հայերի հետ երկկողմանի հաղորդակցության ալիքը: Մենք նրանց հետ խոսում ենք խնդրահարույց հարցերի մասին լիովին բացահայտ, առանց որևէ միջնորդության: Եվ դուք մեր զրույցների օրակարգում կգտնեք իսկապես շատ կարևոր գլուխներ:
Այստեղ գլխավորն այն է, որ ռազմական բախման տարրերը մնում են լիովին դուրս ցանկացած օրակարգից։ Այո՛, մեր միջև վեճ կա։ Բայց հարևան երկրների միջև վեճերը երբեմն լիովին նորմալ են։ Ի վերջո, մենք դա տեսնում ենք ԵՄ որոշ անդամ պետությունների միջև։ Բայց մենք ունենք դիվանագիտություն և երկխոսություն վեճերը լուծելու համար։ Եվ մեզ հաջողվել է Հայաստանի հետ հարաբերությունները ռազմական բախումից տեղափոխել վեճի։ Կարծում եմ՝ սա լավ նշան է», – ասել է Հաջիևը։
