Թյուրքական պետությունների կազմակերպության տրանսպորտի նախարարների 8-րդ հանդիպման ժամանակ ելույթ ունենալով՝ Թուրքիայի տրանսպորտի և ենթակառուցվածքների նախարար Աբդուլքադիր Ուրալօղլուն ընդգծել է Զանգեզուրի միջանցքի կարևորությունը. գրում է APA-ի թուրքական գործակալությունը։
Թուրք նախարարը նշել է, որ Զանգեզուրի միջանցքը կենսական դեր է խաղում Կովկասում հարաբերությունների կարգավորման գործընթացում։
«Մեր տարածաշրջանի համար մեկ այլ լավ լուր է Զանգեզուրի միջոցով նոր հնարավորությունների բացումը: Այս միջանցքը կապահովի Թուրքիայի և Ադրբեջանի միջև ուղիղ ցամաքային կապ և կարևոր քայլ կլինի ամբողջ թյուրքական աշխարհի միավորման ուղղությամբ: Դրանից կշահեն տարածաշրջանի բոլոր երկրները», – ասել է նա:
***
Ինչպես տեսնում ենք, բացի Հայաստանի իշխանություններից, բոլոր երկրներն օգտագործում են «Զանգեզուրի միջանցք» արտահայտությունը։ Նշենք, որ ԵԽԽՎ-ում Նիկոլ Փաշինյանն այսօր հարց ուղղեց բոլորին, թե որտե՞ղ են կարդացել «Զանմգեզուրի միջանցք» արտահայտությունը. այդպիսի անուն Վաշինգտոնում ստորագրված փաստաթղթում չկա։
Վաշինգտոնյան հանդիպումից հետո թուրք և ադրբեջանցի պաշտոնյաները օգտագործում են միայն «Զանգեզուրի միջանցք» տերմինը, թեև մեկ-մեկ թուրքերը հայտարարում են՝ ուզում եք «Զանգեզուրի միջանցք» ասեք, ուզում եք՝ «Թրամփի ուղի», դրանից այս ճանապարհի հետ կապված մեր նպատակները չեն փոխվում։
