Ֆրանսիական հայտնի «Pernod Ricard» ընկերությունը, որ ալկոհոլային թունդ խմիչքների արտադրությամբ աշխարհում առաջիններից է, այլևս Ռուսաստան որևէ տեսակի արտահանում չի իրականացնի։ Այս մասին ռուսական լրատվամիջոցներն են գրում՝ հղում անելով ընկերության պաշտոնական կայքէջի տարածած հաղորդագրությանը։
«Pernod Ricard» ընկերությունը, նշենք, այնպիսի խմիչքներ է թողարկում, ինչպիսիք են՝ «Martell» կոնյակը, «Beefeater» ջինը, «Absolut» օղին, «Olmeca» թեքիլան, «Malibu» լիկյորը, ինչպես նաև՝ «Chivas Regal», «Jameson» և «Ballantineʼs» վիսկիները։
2022-ին ընկերությունը, բացի «Absolut» օղուց, մնացած խմիչքներն արտահանում էր ՌԴ, 2023-ի տարեսկզբին, սակայն, վերանայել էր որոշումն ու վերականգնել նաև «Absolut»-ի արտահանումը։ Բայց, փաստորեն, Շվեդիայի ղեկավարության քննադատությանը տուրք տալով՝ ընկերությունն այժմ Ռուսաստանի հետ մատակարարման կապն ամբողջությամբ է խզում։
Ռուս-ուկրաինական հակամարտությունից հետո, հիշեցնենք, Արևմուտքի ու ԱՄՆ-ի՝ ՌԴ-ի նկատմամբ սահմանված ու սահմանվող պատժամիջոցների հետևանքով համաշխարհային հռչակ ունեցող մի շարք ընկերություններ հեռացել են Ռուսաստանից կամ ժամանակավորապես դադարեցրել են գործունեությունը։
Ս․Վ․
