Պետք է խոստովանեմ, որ թալանվածը հետ բերելու, հանցագործներին պատժելու հեղափոխական օրակարգը մոռացության մատնելը մեր հասցեին ամենահաճախ հնչող մեղադրանքն է: Այդ մասին Ազգային ժողովի՝ ապրիլի 15-ի նիստին ասաց Փաշինյանը՝ անդրադառնալով այն քննադատություններին, թե գործող կառավարությունը հեղափոխությամբ եկավ իշխանության և մոռացավ թալանածը հետ բերելու մասին:
«Կտրականապես մերժում եմ այդ քննադատությունը հետևյալ պատճառաբանությամբ. 2018 թվականի ժողովրդական, ոչ բռնի, թավշյա հեղափոխությունը, այո՛, տվել է թալանվածը հետ բերելու, հանցագործներին պատժելու խոստում, բայց հեղափոխությունը և անձամբ ես, խոստացել ենք նաև, որ հեղափոխության հաղթանակից հետո Հայաստանում վենդետաներ չեն լինելու, որ Հայաստանը լինելու է օրենքի և իրավունքի գերակայության երկիր: Ուրեմն ինչպես էինք համատեղելու, թվում է, իրար հակասող օրակարգերը:
Իրականում օրակարգերն իրար չեն հակասում, և մենք հենց այդ օրակարգերի իրակցմամբ ենք զբաղված եղել և շարունակում ենք դրանվ զբաղվել, այն է՝ բացառել վենդետաները, վերադարձնել թալանվածը, պատժել հանցագործներին և ՀՀ-ն չդարձնել «բեսպրեդելի» սև խորշ աշխարհի քարտեզի վրա, այլ ընդհակառակը՝ օրենքի գերակայությունը դարձնել անշրջելի և ինստիտուցիոնալ»,- ասաց նա:
Ըստ վարչապետի՝ այս գործընթացում խնդիր է այն, որ թալանվածը պահեստավորված չէ մի կոնկրետ հասցեում, այլ տեղաբաշխված է տարբեր տեղերում, տարբեր ձևերով. երբեմն դա Հայաստանում է, երբեմն՝ արտերկրում, երբեմն հայտնի անձանց անունով է, երբեմն՝ դրածո անձանց, երբեմն անշարժ գույք է, երբեմն՝ գումար, երբեմն՝ արվեստի գործ, երբեմն՝ բաժնետոմս…: Իսկ այս համատեքստում ի՞նչ է արել Կառավարությունը:
«2019-ից սկսել ենք թալանի «գորդյան հանգույցն արձակելուն» ուղղված համակարգ ձևավորել: Այս գործն արել ենք հետևողականորեն ու սկզբունքորեն: Այս գործը հետևողականորեն շարունակել ենք, քովիդի, համավարակի, պատերազմի, հետպատերազմյան ճգնաժամի, տարածաշրջանային էսկալացիաների, համակարգային թալանի դիրքերից հանդես եկող քաղաքական ուժերի դիմադրության, աշխարհակարգի փլուզման, Հայաստանի ժողովրդավարական իմիջը միջազգայնորեն պահպանելու կենսական անհրաժեշտության պայմաններում՝ զուգահեռ տնտեսությունն աճեցնելով աննախադեպ չափերով՝ 43,5 տոկոսով»,- ասաց նա:
Infoport.am
