ՀՀ–ում վենդետաներ չեն լինելու, բայց քաղաքական վենդետաներ լինելու են։ ԱԺ ճեպազրույցների ժամանակ այս մասին հայտարարեց «Քաղաքացիական պայմանագիր» խմբակցության քարտուղար Արթուր Հովհաննիսյանը` անդրադառնալով իրենց խմբակցության մեկ այլ պատգամավորի Արսեն Թորոսյանի ֆեյսբուքյան գրառմանը, որտեղ նա գրել էր` քաղաքական վենդետա լինելու է։ Այո՛, հայհոյել չի կարելի ո՛չ ԱԺ ամբիոնից, ո՛չ ԱԺ դահլիճում և ո՛չ էլ որևէ այլ տեղ։
«Քաղաքական վենդետա ասելով` մեր գործընկերը նկատի ունի մեր հանձնառությունները մինչև վերջ իրականացնելը, որոնց արդյունքում այդ մարդիկ քաղաքականապես վերանալու են։ Ես չեմ կարող այս տեսանկյունը չկիսել։ Քաղաքական վենդետա իրականացվում է այն մարդկանց նկատմամբ, որոնք ունեն մեղավորություն»,– նշեց Հովհաննիսյանը։
Լրագրողը հիշեցրեց, որ ՀՀ վարչապետ Նիկոլ Փաշինյանը բազմիցս հայտարարել է, որ վենդետաներ չեն լինելու, ինչին ի պատասխան ՔՊ պատգամավորն արձագանքեց. «Հակասություն ընդհանրապես չկա. Այո՛, վենդետաներ չեն լինելու, բայց քաղաքական վենդետաներ լինելու են»։
Հիշեցնենք, որ մայիսի 14–ի ԱԺ նիստի ժամանակ իրավիճակը նիստերի դահլիճում լարվեց «Հայաստան» խմբակցության պատգամավոր Լևոն Քոչարյանի ելույթից հետո։ Սկսվեց քաշքշուկ ընդդիմադիր և իշխանական պատգամավորների միջև, հնչեցին հայհոյանքներ, վիրավորանքներ։
Infoport.am
