Մի քանի հիանալի օր եմ անցկացրել Հայաստանում, տեսել եմ մարդկանց, ովքեր ցանկանում էին նկարվել ինձ հետ կամ պարզապես ողջունել ինձ։ Այս մասին հունիսի 15-ին Երեւանում «Գիտության եւ բիզնեսի օրեր» համաժողովի ժամանակ ասաց Նոբելյան մրցանակակիր, մոլեկուլային կենսաբան եւ նյարդաբան Արտեմ Պատապուտյանը։
«Հայաստանում հիանալի ընդունելության արժանացա, այդ թվում՝ գիտնականների կողմից։ Այդպիսի շփումը պատիվ եմ համարում։ Դա ցույց է տալիս, թե ինչին է Հայաստանը կարեւորություն տալիս։ Եթե ես կարողանամ օրինակ դառնալ երիտասարդ գիտնականների համար, դա կլինի իմ ամենամեծ ձեռքբերումը»,- պատմեց նա:
«Մարդիկ հաճախ գիտնականներին շփոթում են նրանց հետ, ովքեր շատ գիտելիքներ ունեն։ Բայց գիտնականներն իրականում ոչինչ չգիտեն: Եւ դա նրանց իսկապես դուր է գալիս: Լաբորատորիայում մենք խոսում ենք ոչ թե այն մասին, ինչ գիտենք, այլ նրա մասին, ինչ դեռ չգիտենք, եւ դրա շուրջ մենք սկսում ենք ուսումնասիրել այդ երեւույթը: Հենց դա էլ գրավում է գիտության մեջ՝ ուսումնասիրել այն, ինչ չգիտես»,- ընդգծեց նյարդաբանը։
Յուրաքանչյուր գիտական աշխատանքում, նրա կարծիքով, պետք է հստակ ձևակերպել նպատակները եւ հասկանալ, թե որքանով են դրանք հասանելի, կարեւոր է համեմատել ժամանակը եւ ռեսուրսները։
«Հետազոտական աշխատանքում շատ բան ինտուիտիվ է ստացվում, ինչը, իհարկե, փորձի հետ է գալիս: Բախտը ժպտում է պատրաստված ուղեղներին: Պետք է հաստատակամություն եւ համառություն դրսեւորել: Կարեւորը՝ սիրել քո աշխատանքը»,- նշեց գիտնականը։
