«Գարդման-Շիրվան-Նախիջևան» միությունը դատապարտում է Ադրբեջանի ՄԻՊ-ի անհամապատասխան գործունեությունը: Այս մասին ասված է «Գարդման-Շիրվան-Նախիջևան» համահայկական միության հայտարարության մեջ:
«Վերջին շրջանում Ադրբեջանի Մարդու իրավունքների պաշտպանի գործառույթների ֆորմալ հանձնակատար Սաբինա Ալիևան ինտենսիվ կերպով շարունակում է իր առաքելությանը հակոտնյա գործունեություն ծավալել։ Ադրբեջանը, որտեղ մարդու իրավունքների պաշտպանությունը ուղիղ համեմատական է այդ երկրում ռասիզմի դեմ պայքարին և պարզունակ մարդասիրությանը, այսինքն՝ բացակայում է, պարբերաբար հանդես է գալիս ինչ-որ իրավունքների վերականգնման կամ պաշտպանության պահանջով և դրանով իսկ փորձում է ապակողմնոոշել միջազգային հանրությանը, որի աչքի առաջ անցած մի քանի տարիների ընթացքում Ադրբեջանը պետականորեն ոտնահարել է մարդու հիմնարար իրավունքների սահմանմանն ու պաշտպանությանը միտված բոլոր միջազգային հռչակագրերն ու կոնվենցիաները։
Սաբինա Ալիևայի առաջին գործը պետք է լիներ միջազգային հանրությանը պարբերաբար տեղեկացնել, թե ինչ է իրականում կատարվում Ադրբեջանում, ինչպես են պետական կառույցներում պլանավորվում և իրականացվում ռասիզմի գաղափարախոսության վրա հիմնված ցեղասպանական ծրագրեր՝ ուղղված Լեռնային Ղարաբաղի հայության և վերջինիս ստեղծած ազգային-հոգևոր մշակութային ժառանգության դեմ։ Իսկ գուցե Սաբինա Ալիևան ամենևին չի տիրապետում միջազգային իրավունքի դրույթներին, որոնք պետք է լինեին իր գործունեության առանցքը։
Հակառակ պարագայում Ս․ Ալիևան կիմանար, որ խոսքի ազատության սահմանափակումը ևս մարդու բնական իրավունքների կոպտագույն խախտում է, հետևաբար գուցե կարողանար պատասխանել այն հարցին, թե ինչու են ադրբեջանական բանտերը լցված մարդկանցով, ովքեր բարձրաձայնել են Ադրբեջան պետության ներսում տիրող բռնատիրության և դրա դրսևորումների մասին։
«Գարդման-Շիրվան-Նախիջևան» համահայկական միությունը խստորեն դատապարտում է Ադրբեջանի Մարդու իրավունքների պաշտպանի՝ իր կոչմանը անհամապատասխան գործունեության ծավալումը։ Մենք կոչ ենք անում Սաբինա Ալիևային ուսումնասիրել միջազգային իրավունքի՝ մարդու բնական և անքակտելի իրավունքների պաշտպանության հիմնախնդիրը և միջազգային հանրությանը ապակողմնորոշելու փոխարեն զեկույցով հանդես գալ 1988-1992 թթ․ պատմական Գարդմանի, Շիրվանի, Նախիջևանի, ինչպես նաև Լեռնային Ղարաբաղի հայության դեմ 2020-2023 թթ․Ադրբեջան պետության գործած հանցանքների և դրանց դատապարտման ու պատժի մասին»։
