«4 տարի առաջ այս ստախոսները հայ մարդուն խոստացան արդարություն, սակայն տվեցին պատերազմ, զոհեր, պարտություն։ Սրանք լվացել են բոլոր թալանչիների գլուխները, գերազանցել են բոլոր թալանչիներին։ Այսպիսի պատկեր է լինում, երբ իշխանության են գալիս պրոֆեսիոնալ խաբեբաները»,- Ֆրանսիայի հրապարակում, Միասնության հանրահավաքին իր ելույթում ասաց «Հայաստան» խմբակցության պատգամավոր Անդրանիկ Թևանյանը։
2018 թվականին Փաշինյանը պոպուլիստաբար ասում էր՝ Արցախը Հայաստան է և վերջ, հիմա էլ ասում է՝ Սյունիքը Հայաստան է և վերջ։ Ես նրա այդ խոսքերից գիշերը չեմ կարողանում քնել, որովհետև նրա բերանից հնչածը հակառակ իմաստով է, որը չի կարելի թույլ տալ»,-նշեց Անդրանիկ Թևանյանը։
Նրա պատկերացմամբ՝ Փաշինյանը պլանավորել է մի օր էլ ասել՝ Երևանը Հայաստան է և վերջ։ Բայց դա պլանավորում է անել Փարիզի կամ Վաշինգտոնի իր թաքստոցից։
Թևանյանը նկատեց՝ նման բան չի կարելի թույլ տալ։ Նա թեզեր է առաջարկում, որոնցից է՝ բանակցողի փոփոխությունն անհրաժեշտ է, բայց միակ բավարար պայմանը չէ։ Չի կարելի թույլ տալ, որ Նիկոլին փոխարինի էլ ավելի Նիկոլ։
Չի կարելի հայ-ադրբեջանական բանակցային ձևաչափը և Արցախի հարցը դարձնել աշխարհաքաղաքական մրցակցության կռվախնձոր։ Դա միջազգային արկածախնդրություն է և միայն կորուստներ կբերի մեզ։
Անդրանիկ Թևանյանի առաջարկած հաջորդ թեզը՝ հայ-ադրբեջանական բանակցային ձևաչափը պետք է լինի միայն Երևան-Բաքու-Մոսկվա եռանկյունու մեջ։ Աշխարհաքաղաքական կենտրոնների մրցակցությունից շահում է միայն Ադրբեջանը։
Հայաստանը պետք է շունչ քաշելու ժամանակ ունենա, մենք պետք է բանակցենք, ամեն ձևակերպման համար կռիվ տանք, իսկ թիկունքում զարգացնենք տնտեսությունը, վերականգնենք բանակը, վերացնենք հասարակական թշնամության մթնոլորտը։
Լարվածության թուլացման ու խաղաղության համար պետք է բացվեն կոմունիկացիաները՝ բացառելով միջանցքային տրամաբանությունը։ Սահմանների դելիմիտացիան պետք է իրականացվի սովետական քարտեզներով՝ Ռուսաստանի միջնորդությամբ՝ այնպես, որ դրանից չտուժեն մեր քաղաքացիների իրավունքները, մեր երկրի տարածքային ամբողջականությունը։
Թևանյանի հաջորդ թեզը՝ առանց Արցախի, Հայաստանի գոյությունը հարցականի տակ է, պետք է մեծածավալ ծրագրեր իրականացվեն, որպեսզի Արցախը չհայաթափվի։
