Կառավարությունն իր այսօրվա՝ մարտի 18-ի նիստում որոշեց լուծարել «Պետական լոտո» ՓԲԸ-ն, որն այս պահին փաստացի չի գործում (գտնվելու վայրը՝ Վանաձոր, Տիգրան Մեծի 16):
Որոշման հիմնավորման մեջ, մասնավորապես, նշվում է. «Կառավարության առանցքային մոտեցումները պետական ռեսուրսների կառավարման մասով հանգում են հետևյալին.
– ռեսուրսների կառավարումը պետք է իրականացվի արդյունավետ, օգտավետ և խնայողաբար.
– հանրային յուրաքանչյուր մարմին կամ կազմակերպություն, անկախ կազմակերպաիրավական կամ այլ առանձնահատկություններից, պետք է գործի օրենքով սահմանված որոշակի լիազորությունների շրջանակում՝ իրականացնելով տվյալ մարմնի նպատակներին համապատասխանող և դրանցից բխող գործառույթներ. չպետք է լինեն կրկնություններ, այլընտրանքային, զուգահեռ, փոխարինող կամ թաքնված համակարգեր և (կամ) տվյալ մարմնին ոչ բնորոշ գործառույթներ։
Վերջին տարիներին Ընկերությունը որևէ գործունեություն չի իրականացնում և դրա հետագա գոյությունը ՀՀ կառավարության որդեգրած քաղաքականության համատեքստում գնահատվում է ոչ նպատակահարմար:
Ընկերության տնօրենի հետ կնքված աշխատանքային պայմանագիրը լուծվել է,
Ընկերության հարկային պարտավորությունները մարված են,
վերջին գույքագրման արդյունքներով դեբիտորական և կրեդիտորական պարտավորություններ չեն արձանագրվել,
Ընկերությունը անշարժ և շարժական գույք չունի՝ բացառությամբ բանկային հաշվում առկա դրամական միջոցների՝ շուրջ 30,310,774 ՀՀ դրամ:
