Լոս Անջելեսում արտակարգ դրություն է հայտարարվել անտառային հրդեհների պատճառով, որոնք ընդգրկել են քաղաքի արևմուտքում գտնվող մի քանի շրջաններ։ Վերջին տվյալներով՝ երկու մարդ զոհվել է։ Տասնյակ հազարավոր բնակիչներ տարհանվել են, կրակը մարելու համար աշխատում է գրեթե մեկուկես հազար հրշեջ, սակայն ուժգին քամիները կրակն ավելի են բորբոքում. հայտնում է BBC News-ը։
Լոս Անջելեսի շրջանի հրշեջների ղեկավարը հայտնել է, որ Փասադենայի մերձակայքում հրդեհը երկու մարդու կյանք է խլել:
Գերատեսչության ղեկավար Էնթոնի Մարոնեի խոսքով՝ շատերը այրվածքներ են ստացել։
Փասադենայի մերձակայքում բռնկված հրդեհն արդեն ընդգրկել է ավելի քան 900 հեկտար տարածք, և, ըստ Մարոնեի, այն հնարավոր չէ հանգցնել, թեև 700 հրշեջներ պայքարում են կրակի դեմ։
Իշխանությունները զգուշացնում են, որ իրավիճակը սրվում է փոթորկոտ քամիների և չոր եղանակի պատճառով։
Փասադենայի մոտ բռնկված հրդեհն արդեն ավերել է ավելի քան 100 շենք, այն սպառնում է Լոս Անջելեսի և շրջակա տարածքի բոլոր բնակիչներին։
Լոս Անջելեսում ապրում է 9,66 միլիոն մարդ:
Վարչաշրջանի շերիֆ Ռոբերտ Լունան լրագրողներին ասել է, որ Փասադենայի և շրջակա տարածքի 32,500 բնակիչների այժմ տարհանման հրաման է տրվել, ևս 38,600-ը նախազգուշացվել է հնարավոր տարհանման մասին:
