Եվրոպական դիվանագիտության ղեկավար Ժոզեպ Բորելը հայտարարել է, որ ԵՄ-ն կշարունակի աշխատել Ալեքսանդր Լուկաշենկոյի հետ, չնայած ընտրություններում նրա հաղթանակը չի համարում լեգիտիմ։ Այդ մասին Բորելն ասել է El País թերթին տված հարցազրույցում: Միևնույն ժամանակ, ԵՄ արտաքին քաղաքականության գերագույն ներկայացուցիչը նշել է, որ իրենք նպատակ չունեն «Բելառուսը վերածել երկրորդ Ուկրաինայի»:
Փորձագետների կարծիքով՝ Բորելի խոսքերը վկայում են, որ Բրյուսելն այս փուլում համակերպվել է, որ Բելառուսում անհնար կլինի իշխանափոխությունը: Միևնույն ժամանակ, վերլուծաբանները կարծում են, որ ԵՄ-ն կշարունակի աջակցել բելառուսական ընդդիմությանը և մեծացնել իր ազդեցությունը երկրում:
«ԵՄ-ն ցանկանում է ապահովել, որ «բելառուսները հնարավորություն ունենան ազատորեն արտահայտելու իրենց կարծիքը», ասել է Բորելը: Միևնույն ժամանակ, նա շեշտել է, որ Բելառուսի շուրջ ստեղծված իրավիճակը հնարավոր չէ համեմատել 2014 թվականի ուկրաինական ճգնաժամի հետ, քանի որ աշխարհաքաղաքական գործոնը կարևոր դեր է խաղացել Ուկրաինայի իրադարձություններում:
«Մենք ունենք ֆինանսական ռեսուրսներ, հավաքել ենք 50 միլիոն եվրո բելառուս հասարակությանը օգնելու համար, մենք ունենք քաղաքական ազդեցություն, բայց Բելառուսը չպետք է լինի երկրորդ Ուկրաինա», ասել է դիվանագետը:
