Ուկրաինայի նախագահ Վլադիմիր Զելենսկին և ԱՄՆ փոխնախագահ Ջեյ Դի Վենսը Վատիկանում սեղմել են նոր Պապ Լեո XIV-ի ձեռքը նրա գահակալության արարողության ժամանակ. Գրում է BBC-ի ռուսական ծառայությունը։
Արարողության ժամանակ Զելենսկին նստած է եղել Եվրահանձնաժողովի նախագահ Ուրսուլա ֆոն դեր Լեյենի կողքին։ Վենսը՝ մոտակայքում։
Վերջին անգամ Զելենսկին և Վենսը Սպիտակ տանը հանդիպել են փետրվարին, երբ Զելենսկին, Վենսը և Թրամփը պատմական վեճ են ունեցել Ուկրաինայի պատերազմի և ԱՄՆ-ի օգնության թեմայով հանդիպմանը։
Կաթոլիկ եկեղեցու նոր ղեկավարը պատարագի ավարտին իր աղոթքում մտահոգություն է հայտնել Ուկրաինայում պատերազմի վերաբերյալ՝ ասելով. «Նահատակված Ուկրաինան սպասում է արդար և երկարատև խաղաղության բանակցությունների մեկնարկին»։
Պատարագից հետո նա հանդիպել է Ուկրաինայի նախագահի և առաջին տիկին Օլենա Զելենսկայայի հետ։
Նշենք, որ երդմնակալության պատարագի ժամանակ նոր Հռոմի պապ Լեո XIV-ին հանձնվել են պապական իշխանության խորհրդանիշներ՝ «Ձկնորսի մատանին» և օմոֆորիոնը։
Վատիկանի Սուրբ Պետրոսի հրապարակում հանդիսավոր արարողությունը սկսվեց նրանով, որ Հռոմի պապը, Արևելյան կաթոլիկ եկեղեցիների պատրիարքների ուղեկցությամբ, իջավ Սուրբ Պետրոսի տաճարի դամբարան, որտեղ նա ծնկի իջավ և աղոթեց Հռոմի առաջին եպիսկոպոսի մասունքների մոտ։
Հռոմի պապը առաքյալի պատկերով ոսկե մատանի ստացավ ավետարանչության դիկաստերիայի պրոպրեֆեկտ, ֆիլիպինցի Լուիս Անտոնիո Տագլեից։ «Ձկնորսի մատանու» նվիրաբերումը խորհրդանշում է Հռոմի պապի նշանադրությունը եկեղեցու հետ։
Արարողությանը մասնակցելու համար հավաքվել է առնվազն 250 հազար ուխտավոր։ Հանդիսությանը ներկա են նաև 156 օտարերկրյա պատվիրակություններ և երկրների առաջնորդներ:
