Պետությանը պատկանող ռազմական գույքը, տվյալ դեպքում՝ ուղղաթիռը, Փաշինյանն ու նրա կինն օգտագործել են Տաթև գնալու և այնտեղ «Կրթվելը նորաձև է» բանախոսությունն անց կացնելու համար։
Բացի ուղղաթիռից, նրանք օգտվել են ռազմական ոլորտում ծառայող անձնակազմի ծառայություններից։
Փաշինյանի հրապարակած տեսանյութերում ռազմական ոլորտի ծառայողները ռազմական ուղղաթիռով նրան ու Աննա Հակոբյանին տեղափոխում են Տաթև։
Որևէ մեկը իրավասո՞ւ է պատասխանելու, թե արդյո՞ք Նիկոլ Փաշինյանն ու Աննա Հակոբյանն իրավունք ունեն ոչ պետական կամ ոչ աշխատանքային, առավել ևս՝ ռազմական ոլորտին չառնչվող այցի նպատակով, այլ մասնավոր նախաձեռնությունը հերթական անգամ հանրության մի փոքր հատվածին ներկայացնելու համար օգտագործել հույժ կարևոր անհրաժեշտությունների համար նախատեսված պետական ռազմական գույքը։
Թեպետ պետք է նկատի առնել, որ Փաշինյանն ու Հակոբյանը, ամեն շաբաթ պետական ռեսուրսներ ու միջոցներ օգտագործելով, Հայաստանի տարբեր վայրեր են տեղափոխվում՝ անցկացնելու «Կրթվելը նորաձև է» ոչ պետական ծրագիրը։ Ինչպես հայտնի է, այն միայն ու միայն մասնավոր նախաձեռնություն է։
